Miklar lækkanir í Bandaríkjunum

Hlutabréfamarkaðir í Bandaríkjunum tóku dýfu er þeir opnuðu fyrir skömmu vegna ákvörðunar Breta um að segja sig úr Evrópusambandinu.

Dow Jones vísitalan féll um 500 stig, um 3 prósent, á fyrstu mínútunum eftir opnun markaða ytra, S&P 500 vísitalan féll um 2,6 prósent og Nasdaq féll um 3,6 prósent. Hlutabréf í bönkum á borð við Bank of America, Citigroup og JP Morgan tóku á sig mesta höggið og lækkuðu þau um allt að sjö prósent.

Fréttastofa Reuters segir að ákvörðun Breta um að yfirgefa Evrópusambandið sé það versta sem komið hefur fyrir alþjóðlegan efnahag frá kreppunni árið 2008.

Hlutabréfamarkaðurinn á Íslandi hefur tekið skarpa dýfu niður á við í dag. engi bréfa í HB Granda lækkar mest, eða um 4,31 prósent í 120 milljóna króna viðskiptum. Úrvalsvísitalan OMXI hefur samtals lækkað um 3,5 prósent og ekkert fyrirtæki hefur hækkað.

Það sama má segja um hlutabréfavísitölur í Evrópu og Asíu sem hafa hríðfallið. Þá hefur breska pundið fallið um allt að tíu prósent og hefur það ekki verið lægra síðan 1985.

Alls óvíst er hvað tekur við nú en væntanleg úrsögn Bretlands er fordæmalaus þar sem ekkert ríki hefur áður sagt sig úr ESB. Er ljóst að hegðun aðila á markaði endurspeglar þessa óvissu.