Guðmundur ráðinn forstöðumaður hjá Flugfélagi Íslands

Guðmundur Óskarsson hefur verið ráðinn forstöðumaður sölu- og markaðssviðs Flugfélags Íslands.

Guðmundur hefur starfað sem forstöðumaður markaðs- og viðskiptaþróunar Icelandair undanfarin átta ár, en þar áður var hann markaðsstjóri Icelandair í Skandinavíu á árunum 2006 til 2008 og markaðsstjóri Icelandair í Mið-Evrópu frá 2004 til 2006.

Í tilkynningu kemur fram að Guðmundur sé með Bachelor gráðu í alþjóðaviðskiptum frá Penn State University í Bandaríkjunum og með diplómagráðu í alþjóðasamskiptum frá Universität Leipzig í Þýskalandi.

Guðmundur er kvæntur Kristínu Þorleifsdóttur og eiga þau tvö börn.