Frumkvöðlar fengu 35 milljónir í fjármögnun en sögðu nei takk

Framleiðendur og forsprakkar íslenska sprotafyrirtækisins Study Cake sem gefur út samnefnt smáforrit afþökkuðu nýlega 35 milljón króna fjármögnun sem ætluð var til þess að koma vörunni á markað í Bretlandi.

Í bréfi sem stofnendur þrír, Kjartan Þórisson, Hörður Guðmundsson og Kristján Ingi Geirsson, birta á vefsíðu Study Cake þar sem farið er yfir ákvörðun þeirra segja þeir að uppgangur Study Cake hafi verið hraður.

„Í júní 2015, rétt eftir ævintýralega útskriftarferð á Tyrklandi, fengum við símtal frá fulltrúum Startup Reykjavík. Þetta símtal markaði á sínum tíma ákveðin kaflaskil í lífi okkar stofnendanna. Við fengum inngöngu í frábæran viðskiptahraðal og tvær milljónir íslenskra króna til þess að setja á fót fyrirtæki,“ segir í bréfinu.

Sjá einnig: Ráðast gegn ólæsi með nýju appi

Markmið þeirra var að gera heimavinnu skólabarna skemmtilegri en en fljótlega rákust þeir á vandamálið sem felst í minnkandi læsi barna og ungling. Því hafi kviknað hugmynd um að þróa smáforrit sem ætlað var að auka læsi barna og unglinga.

„Varan, sem fékk nafnið Study Cake, var kynnt í höfuðstöðvum Arion Banka í ágúst 2015, en síðan settumst við að í Nýsköpunarmiðstöð Íslands til þess að undirbúa okkur fyrir janúarútgáfu appsins og mögulega fjármögnun,“ segir í bréfinu.

Á innan við mánuði frá því að smáforritið var gefið út höfðu fimm þúsund manns sótt forritið og var m.a. fjallað um það á Alþingi. Þegar 7.500 notendur voru komnir í smáforritið fóru fjárfestar að sýna fyrirtækinu áhuga.

Sjá einnig: Heimanámið ætti að verða leikur einn

„Um þetta leyti hófust langar samningaviðræður, sem enduðu með samkomulagi: hópur fjárfesta myndi setja 35 milljónir króna inn í félagið yfir 18 mánaða tímabil. Þessi fjárfesting átti að ýta undir vöxt fyrirtækisins og var markmiðið sett á að gefa út vöru í Bretlandi,“ segir í bréfinu.

„Það fylgir því hins vegar mikil ábyrgð að taka við fjármunum annara. Áður en tekið er við miklum fjármunum sem á að eyða í framleiðslu og kynningu verða frumkvöðlar að spyrja sig mikilvægra spurninga,“ segir í bréfinu. „Er hægt að tekjuvæða lausnina? Er varan vítamín eða meðal? Eru stofnendur tilbúnir til þess að vinna í þessu næstu 5 til 10 árin, og þar af leiðandi — í okkar tilfelli — er lokamarkmiðið þess virði að fresta háskólanámi um ókomna tíð?“

Komust þeir að þeirri niðurstöðu eftir mikla íhugun að setjast frekar á skólabekk í stað þess „að fórna næstu 10 árum í vinnu við framleiðsluna.“ Fjárfestarnir voru því boðaðir á fund og fjármögnunin afþökkuð.

Leita þeir félagar nú að mögulegum arftökum til þess að taka við Study Cake hér á landi til þess að smáforritið geti nýst í íslenskum skólum og heimilum en nú hafa rúmlega níu þúsund manns sótt smáforritið.

Lesa má bréfið í heild sinni hér.