Tjáir sig ekki um launahækkanir þingmanna

Jónas Þór Guðmundsson, formaður kjararáðs, vill ekki tjá sig um hvort kjararáð sé með til skoðunar að gera breytingar á launum þingmanna og ráðherra.

Gylfi Arnbjörnsson, forseti ASÍ, sagði um miðjan júlí að það stæðist vart til lengdar að ráðuneytisstjórar væru á hærri launum en ráðherrar. Ummælin komu í kjölfar úrskurða kjararáðs um launahækkanir ráðuneytisstjóra, skrifstofustjóra ráðuneyta og fleiri embættismanna fyrr í sumar.

Jónas vill heldur ekki tjá sig um gagnrýni verkalýðshreyfingarinnar um að úrskurðir kjararáðs um hækkanir setji SALEK-samkomulagið í uppnám og kalli á aðgerðir af hálfu Alþingis.

Kjararáð úrskurðaði síðast sérstaklega um laun þingmanna og ráðherra í árslok 2008 þar sem þingfararkaup var lækkað um 7,5 prósent og ráðherralaun um 14-15 prósent eftir lagabreytingu sem kvað á um lækkanir á launum þeirra. Síðan hafa laun þingmanna og ráðherra fylgt almennum launahækkunum kjararáðs.

Fréttin birtist fyrst í Fréttablaðinu