Kjartan Henry skoraði tvö í bikarsigri

Kjartan Henry Finnbogason skoraði tvö mörk í 3-1 sigri AC Horsens á Tarm IF í fyrstu umferð bikarkeppninnar í Danmörku.

Kjartan kom Horsens yfir á fimmtu mínútu með skalla eftir sendingu frá Nielsen og hann var svo aftur á ferðinni á 24. mínútu eftir sendingu frá Aabech.

Staðan var 2-0 í hálfleik, en Jonas Gemmer skoraði þriðja mark Horsens á 56. mínútu. Skömmu síðar kom Kjartan boltanum í markið, en var dæmdur rangstæður.

Lasse Kristensen minnkaði muninn fyrir Tarm á 79. mínútu, en nær komust heimamenn í Tarm ekki. Kjartan gerði sig líklegan til að skora einu sinni í viðbót, en varið var frá honum. Lokatölur 3-1.

Þetta var fyrsta umferðin í dansa bikarnum og eru því nýliðarnir í dönsku úrvalsdeildinni komnir áfram í næstu umferð.