Sagði Clinton ætla í stríð við bændur

„Hillary Clinton vill loka fjölskyldubýlum alveg eins og hana langar að loka námunum og stálvinnslum. Hún mun ekki einungis gera þetta með lagabreytingu heldur einnig með því að hækka skatta á bóndabýli og öll viðskipti um allt að 50 prósent.“

Þetta sagði Donald Trump, forsetaefni Repúblikanaflokksins, á kosningafundi í Iowa í Bandaríkjunum í dag. Hann lýsti stefnum Clinton sem „stríði“ gegn bændum.

Hann sagðist einnig ætla að stöðva „afskipti Umhverfisstofnunar Bandaríkjanna“ af bændum og jörðum þeirra.

AP fréttaveitan bendir hins vegar á að á heimasíðu framboðs Clinton megi finna áætlun um aukinn stuðning við minni býli og að hún muni skapa öryggisnet sem notað verði til að hjálpa bændum í gegnum erfiða tíma.