Hráolíurisar sammælast um aðgerðir

Rússland og Sádi-Arabía, tveir stærstu hráolíuframleiðendur heims, hafa sammælst um að vinna í sameiningu að stöðugum olíumarkaði. Orkumálaráðherrar landanna tilkynntu um samkomulagið í gær að loknum fundi þeirra á G20 ráðstefnunni í Hangzhou í Kína. Hráolíuverð tók kipp upp á við í kjölfar frétta af samningnum.

Í samkomulagi ríkjanna tveggja felst meðal annars að sameiginlegum starfshópi ríkjanna verður komið á fót en helsta verkefni hópsins mun verða að útfæra leiðir til að ná markmiðum samkomulagsins. Að öðru leyti hefur ekki verið tilgreint hvaða aðferðum ríkin tvö hyggjast beita til að ná sameiginlegu markmiði sínu.

„Sem stendur er engin þörf á því að hægja á eða stöðva framleiðslu,“ sagði Khalid Al-Falih, orkumálaráðherra Sádi-Arabíu, við Al Arabiya sjónvarpsstöðina eftir að tilkynnt var um samkomulagið. „Það er meðal vopna í vopnabúrinu en ekki þarf að grípa til þess nú. Markaðurinn jafnar sig dag frá degi.“

Alexander Novak, orkumálaráðherra Rússa, sagði við Bloomberg að fjöldi leiða væri þjóðunum fær. Það myndi skýrast síðar hvaða leið yrði valin. Áætlað er að orkumálaráðherrarnir tveir hittist í þrígang á næstu mánuðum. Fundirnir verða í fyrsta lagi á ráðstefnu International Energy Forum í Alsír síðar í þessum mánuði, samhliða fundi starfshópsins í október og á ráðherrafundi Samtaka olíuframleiðsluríkja, OPEC, í Vín í nóvember.

Í kjölfar frétta af fundinum hækkaði verð á hráolíu um þrjú prósent og fór um tíma yfir 49 dollara á tunnuna. Olíuverð hefur verið á hægri uppleið það sem af er ári eftir verðhrun síðustu átján mánaða. Lægst var verðið um miðjan janúar en þá fór hráolíutunnan niður fyrir 28 dollara og hafði ekki verið ódýrari frá árinu 2003. Dýfuna í janúar mátti að stórum hluta rekja til þess að olíuforði Írana flæddi inn á markaðinn eftir að viðskiptaþvingunum á landið var aflétt.

Þegar í harðbakkann slær hefur það komið fyrir að OPEC-ríkin hafi samið um að draga úr framleiðslu. Slíkir samningar hafa hins vegar átt til að fara út um þúfur, áður, eða skömmu eftir, að þeir koma til framkvæmda. Aðildarríki OPEC eru alls fjórtán en Rússland er ekki eitt þeirra. Minnst tvö OPEC-ríki, Kúveit og Sameinuðu arabísku furstadæmin, hafa fagnað samkomulaginu þó enn sé ekki ljóst hvaða aðgerðir það hefur í för með sér. Í yfirlýsingum frá orkumálaráðherrum landanna kemur fram að það sé jákvætt að tvö stærstu olíuríki heims ætli sér að vinna í sameiningu að því að koma olíumarkaðnum á réttan kjöl. 

Þessi frétt birtist fyrst í Fréttablaðinu.

UAE is encouraged by the cooperation between the Kingdom of Saudi Arabia and the Russian Federation as largest two producers in the world_1

— سهيل المزروعي (@HESuhail) September 5, 2016