Óttar Magnús heimsækir Ole Gunnar hjá Molde

Óttar Magnús Karlsson, framherji Víkings og U21 árs landsliðs Íslands, fer til Molde í Noregi í næstu viku og kíkir á aðstæður hjá norska úrvalsdeildarliðinu, samkvæmt heimildum Vísis.

Ole Gunnar Solskjær, þjálfari Molde, heillaðist mikið af þessum 19 ára gamla framherja þegar hann kom hingað til lands í sumar og er búinn að bjóða honum út á leik Molde og Sogndal 16. október.

Óttar er búinn að samþykkja heimboðið en hann mun skoða aðstæður hjá Ole Gunnari og lærisveinum hans og horfa á leik liðsins gegn Sogndal í norsku úrvalsdeildinni.

Molde er í fjórða sæti deildarinnar en Brann í Bergen, sem er í öðru sæti, hefur einnig áhuga á Óttari og er búið að bjóða honum að koma að kíkja á aðstæður, samkvæmt heimildum Vísis.

Forráðamenn Brann voru á Þróttarvellinum þar sem Víkingur lagði Þrótt, 2-1, í lokaumferð Pepsi-deildarinnar og ræddu við framherjann að leik loknum.

Óttar Magnús spilaði sinn fyrsta leik í Pepsi-deildinni árið 2013 aðeins 16 ára gamall áður en hann hélt utan til Ajax í Hollandi. Hann kom heim fyrir tímabilið og skoraði sjö mörk í 20 leikjum.

Hann á að baki 26 leiki fyrir öll yngri landslið Íslands en hann var valinn í fyrsta sinn í U21 árs landsliðið á þessu tímabili fyrir frammistöðuna í Pepsi-deildinni.

Óttar Magnús var kosinn efnilegasti leikmaður Pepsi-deildarinnar af leikmönnum deildarinnar.