Jón Arnór gæti spilað með KR fyrir áramót

Jón Arnór Stefánsson, leikmaður KR í Domino's-deild karla í körfubolta, gæti snúið aftur fyrir áramót og spilað með Íslandsmeisturunum í fyrri hluta deildarkeppninnar.

Þetta kemur fram á heimasíðu KR þar sem segir að Jón Arnór fór í speglun síðastliðinn fimmtudag. Hann er verkjaminni, líður vel og er kominn á fullt í endurhæfingu.

Áætlað er að endurhæfingin taki um fjórar vikur og er því, sem fyrr segir, vonast til að þessi besti körfuboltamaður þjóðarinnar geti spilað með KR áður en fyrri umferðinni í Domino´s-deildinni lýkur.

KR hefur reyndar ekkert saknað Jóns en liðið trónir á toppi deildarinnar með átta stig af átta mögulegum en það er búið að pakka saman öllum mótherjum sínum. Nú síðast valtaði liðið yfir Hauka sem það mætti í lokaúrslitum deildarinnar í maí.

KR var einnig án Pavels Ermolinskij fyrstu þrjár umferðirnar vegna meiðsla en Pavel sneri aftur í sigrinum gegn Haukum og má búast við því að meistarar síðustu þriggja ára verði orðnir fullmannaðir fyrir áramót.

Jón Arnór spilaði síðast leik á Íslandsmótinu fyrir KR í lokaúrslitunum árið 2009 þegar vesturbæjarliðið vann Grindavík í frægum oddaleik um Íslandsmeistaratitilinn.