Jólaeftirréttur: Sindri eins og viðvaningur í eldhúsinu og Eva Laufey þurfti að hafa sig alla við

Sindri Sindrason, fréttaþulur og dagskrárgerðamaður, er þekktur fyrir margt annað en að kunna til verka í eldhúsinu.

Eva Laufey Hermannsdóttir, sjónvarpskokkur, gerði heiðarlega tilraun til þess að kenna honum að gera ótrúlega einfaldan jóla-eftirrétt í kvöldfréttum Stöðvar 2 föstudagskvöldið 2. desember.

Eva varð að leiðbeina Sindra í gegnum hvert einasta smáatriði og það við gerð eftirréttar sem átti að vera lauflétt að bera fram.

Hér að neðan má sjá ítarlega uppskrift frá Evu og hér að ofan má sjá myndband hvernig til tókst hjá þeim.

Botn

200 g piparkökur

150 g brætt smjör

Aðferð: Setjið piparkökurnar í matvinnsluvél og maukið, hellið smjörinu saman við og maukið svolítið lengur. Skiptið piparkökubotninum í litlar skálar/glös eða þrýstið kexblöndunni í form. (gott að nota 20x20 cm lausbotna smelluform)

Fylling

300 g vanilluskyr

250 ml rjómi

2 – 3 tsk flórsykur

1 tsk vanilludropar eða sykur

Aðferð: Þeytið rjóma og blandið skyrinu saman við ásamt flórsykri og vanillu. Skiptið skyrblöndunni í glös eða í eitt stórt kökuform. Endurtakið leikinn með piparkökumulninginn og setjið svo aðeins meira af skyrblöndunni yfir. Best er að geyma kökuna í kæli í 2 – 3 klst eða yfir nótt. Berið kökuna fram með æðislegri saltkaramellusósu.

Saltkaramellusósa

200 g sykur

2 msk smjör

½  – 1 dl rjómi

½ tsk sjávarsalt

Aðferð: Setjið sykurinn á pönnu og bræðið hann við vægan hita. Gott er að hafa ekki of háan hita og fara hægt af stað. Takið pönnuna af hellunni þegar sykurinn er allur bráðinn og bætið smjörinu saman við og hrærið vel. Hellið rjómanum út í karamelluna og hrærið þar til karamellan er þykk og fín. Í lokin bætið þið saltinu saman við. Leyfið sósunni að kólna alveg áður en þið hellið henni yfir kökuna.