Tiger í tíunda sæti fyrir lokahringinn

Kylfingurinn Tiger Woods sýndi á köflum gamalkunna takta á þriðja hring Hero World Challenge sem fer fram um helgina á Bahama-eyjum en hann er í tíunda sæti fyrir lokahringinn á þessu árlega boðsmóti.

Tiger byrjaði hringinn í gær af krafti og fékk fjóra fugla á fyrstu fimm holunum en hann missti örlítið flugið á seinni níu holum vallarins.

Fékk hann skolla tvær holur í röð á 13. og 14. braut en hann fékk að lokum tvöfaldan skolla á átjándu braut eftir að hafa krækt í sex fugla á hringnum.

Tiger er átta höggum frá efsta kylfing, hinum japanska Hideki Matsuyama, en þetta er fyrsta mót sem Tiger tekur þátt í frá ágúst 2015.

Hefur hann á undanförnum árum hrunið niður heimslistann í golfi en þessi fyrrum besti kylfingur heims situr nú í 898. sæti listans.