Þingsályktun um þjóðaratkvæði á síðasta ári kjörtímabilsins

Jón Steindór Valdimarsson þingmaður Viðreisnar segir engan vafa á því að lögð verði fram þingsályktunartillaga um þjóðaratkvæðagreiðslu um framhald viðræðna við Evrópusambandið síðar á kjörtímabilinu.

Í stefnuyfirlýsingu ríkisstjórnar Sjálfstæðisflokksins, Viðreisnar og Bjartrar framtíðar segir að „komi fram þingmál um þjóðaratkvæðagreiðslu um aðildarviðræður við Evrópusambandið eru stjórnarflokkarnir sammála um að greiða skuli atkvæði um málið og leiða það til lykta á Alþingi undir lok kjörtímabilsins.“

Þá segir að stjórnarflokkarnir kunni að hafa ólíka afstöðu til málsins og virða það hver við annan. 

Jón Steindór Valdimarsson þingmaður Viðreisnar var gestur í Sprengisandi á Bylgjunni í morgun. Jón Steindór sagði að niðurstaða stefnuyfirlýsingar ríkisstjórnarinnar varðandi Evrópumál hafi verið ásættanleg. Þingmenn Viðreisnar hafi metið stöðuna svo að flokkurinn kæmist ekki lengra með málið í ljósi ólíkrar stefnu ríkisstjórnarflokkanna.

„Þá ákváðum við eftir mikla umhugsun og eftir mikla umræðu innan okkar eigin flokks og margar tilraunir til að þoka þessu lengra, að þetta væri niðurstaða í stjórnarsáttmálanum sem við gætum lifað við. Það er rétt að ítreka að þetta er ekki okkar óskaniðurstaða. Við mátum það þannig að við kæmumst einfaldlega ekki lengra.“

Jón Steindór sagðist leggja þann skilning í orðalagið „undir lok kjörtímabilsins“ að um sé að ræða síðasta ár kjörtímabilsins.

„Þetta er orðað þannig í stjórnarsáttmálanum að „komi fram“ það er eins og þarna sé einhver mistería um hvort einhverjum detti það í hug. Ég get þá bara upplýst það hér og nú að hún mun koma fram.“

Jón Steindór sagðist ekki reikna með að styðja þingsályktun sem kæmi fram fyrr því hann sagðist líta svo á að hann hefði skuldbundið sig til að styðja ríkisstjórnarsamstarfið og þessa málamiðlun.

„Ég er þátttakandi núna í ríkisstjórn sem að hefur gert þetta samkomulag og ég virði það samkomulag, en ég ætlast að sama skapi til þess af ríkisstjórninni og öllum þingmönnum, líka sjálfstæðisþingmönnunum, að þeir muni greiða götu þess að slíkt mál fái framgang á síðasta ári kjörtímabilsins og muni ekki leggja stein í götu þess.“