Kristján Arason vill losna við fjóra lykilmenn í íslenska landsliðinu

Kristján Arason, einn af þremur leikmönnum sem hafa skorað þúsund mörk fyrir Ísland, hefur sterka skoðun á því hver næstu skref eiga vera hjá Geir Sveinssyni landsliðsþjálfara eftir að Ísland endaði í 14. sæti á HM í Frakklandi. Kristján vill frekari endurnýjun á íslenska liðinu.

„Þó að það sé verið að byggja upp nýtt lið þá má metnaðurinn ekki minnka. Það er ekki stíll okkar Íslendinga að sætta okkur við fjórtánda sæti. Þetta eru blendnar tilfinningar en margt jákvætt átti sér samt stað,“ segir Kristján í samtali við íþróttadeild 365. Hann hrósar sérstaklega þremur bestu leikmönnum Íslands í einkunnagjöf 365.

„Rúnar Kárason er búinn að vinna sér inn fyrsta sætið en við erum búin að leita lengi að leikmanni í þessa stöðu eftir að Ólafur Stefánsson hætti. Þó að þeir séu mjög ólíkir leikmenn þá var Rúnar klárlega okkar besti leikmaður í þessari keppni,“ segir Kristján en Rúnar var með næsthæstu einkunnina.

„Bjarki Elísson kemur inn og slær í gegn. Ég er á því að hann gæti orðið fyrsti maður í vinstra horninu sem er búið að vera einangrað í tuttugu ár af einum besta hornamanni heims,“ segir Kristján um Bjarka Má Elísson og hrósar einnig nafna hans í vörninni.

„Bjarki Már Gunnarsson kom mjög á óvart og leið mjög vel þarna aftar í vörninni. 6:0 vörnin var okkar sterkasta vopn í mótinu,“ segir Kristján.

Þurfa að taka stórar ákvarðanir

„Núna eru stórar ákvarðanir sem þjálfararnir verða að taka. Við erum með Guðjón Val, Arnór Atla, Ásgeir Örn og Kára. Ég er á því að fá bara unga leikmenn inn fyrir alla þessa fjóra leikmenn. Ég held að það sé kominn tími á að liðið hans Arons Pálmarssonar taki við. Við vorum með liðið hans Ólafs Stef og svo með liðið hans Guðjóns Vals. Mér finnst kominn tími á að gefa þessum yngri mönnum allt sviðið,“ segir hann.

Kristján segir að það sé nóg af ungum mönnum til að taka við en verði þessi ákvörðun tekin þá þurfi jafnframt að huga vel að liðinu á næstu misserum.

„Það er ekki nóg að gera þetta. Það þarf að færa margar fórnir. HSÍ og landsliðsþjálfararnir þurfa, ef þeir taka þessa ákvörðun, að sjá til að liðið komi saman í hvert skipti sem einhver möguleiki er á því. Liðið þyrfti þá að æfa saman meira en hinar þjóðirnar. HSÍ þarf að vera tilbúið að eyða peningum í þetta og þjálfararnir þurfa að vera frekir að fá leikmenn saman þrátt fyrir að tímabilið sé búið. Sumarfríin verða styttri en það er okkar styrkleiki að þessir strákar eru flestir hérna á höfuðborgarsvæðinu og geta því æft án þess að þurfa að búa á hótelum,“ segir Kristján Arason.

Frétt Stöðvar 2 um málið má sjá í spilaranum hér að ofan.