Óli Kristjáns: Annað hvort hefurðu 100 prósent traust eða ekkert

Það hefur gefið á bátinn hjá danska liðinu Randers þar sem Ólafur Helgi Kristjánsson er þjálfari. Hannes Þór Halldórsson stendur svo á milli stanganna hjá félaginu.

Eftir gott gengi framan af tímabili hefur Randers tapað sjö leikjum í röð í deildinni og ekki skorað í síðustu sex leikjum.

Randers segist þó standa þétt við bakið á Ólafi í þessum ólgusjó.

„Þetta er eins og hjá öllum fótboltafélögum. Það eru góðir tímar og slæmir tímar. Við erum í smá öldudal núna,“ sagði Ólafur við Hjört Hjartarson í Akraborginni á X977.

„Ég átta mig á einhverju leyti að því hvað sé að. Krísur liða eru mismunandi. Okkar banabiti er að við eigum erfitt með að skora og það hefur gripið um sig smá hjálparleysi. Við erum að fá færi og ættum að skora meira. Trúin og sjálfstraustið er aðeins farið að þverra.“

Ólafur segist ekki hafa tapað klefanum hjá félaginu og óttast ekki að leikmenn standi ekki með sér sem og stjórn félagsins.

„Meðan þú ert í starfi þá hefurðu traust og þú hefur það þangað til þú hefur það ekki lengur. Það er ekki til neitt sem heitir 5 eða 90 prósent traust. Annað hvort hefurðu 100 prósent traust eða ekkert. Það er ekki óeðlilegt að það sé verið að velta fyrir sér minni framtíð. Ef vinnan sem maður vinnur er góð og samstarf þjálfara við leikmenn er gott og það sést út á vellinum þá er þetta oft spurning um að halda áfram á þeirri braut.

Hlusta má á viðtalið í heild sinni hér að ofan.