Pawel harðorður á þingi: Kosningafnykur af samþykkt samgönguáætlunar

Annan daginn í röð við upphaf þingfundar á Alþingi gerðu þingmenn stjórnarandstöðunnar athugasemdir við orð sem Benedikt Jóhannesson, fjármálaráðherra, lét falla í útvarpsþættinum Bítið á Bylgjunni í gær um „siðlaust“ og „stjórnlaust“ þing í tengslum við samþykkt samgönguáætlunar í október síðastliðnum og síðan í tengslum við fjárlög þessa árs þar sem ekki var gert ráð fyrir jafnmiklum fjármunum í samgönguúrbætur og samþykkt var í samgönguáætlun.

Kölluðu þingmenn stjórnarandstöðunnar meðal annars eftir upplýsingum frá Unni Brá Konráðsdóttur, forseta þingsins, varðandi það hvort hann hefði rætt við ráðherrann vegna þessara orða. Kvaðst hún hafa átt samtal við Benedikt og bent honum á umræðuna á þingi í gær. Þá benti hún á að fjármálaráðherra verður í óundirbúnum fyrirspurnum á morgun.

Ekki fór mikið fyrir þingmönnum meirihlutans í umræðunni en Pawel Bartoszek, þingmaður Viðreisnar og samflokksmaður fjármálaráðherra, kvaddi sér þó hljóðs:

„Ég verð þá að svara því að mér finnst persónulega ef Alþingi Íslendinga ákveður að þenja út samgönguáætlun tveimur vikum fyrir kosningar þá hefur það auðvitað þau áhrif að það eykur vinsældir þeirra flokka sem eru á þingi á kostnað þeirra flokka sem eru þar ekki. Mér finnst það ekki til eftirbreytni, sérstaklega ef einhverjir þingmenn, og þeir taka það þá til sín sem eiga, að hugsanlega verði ekki staðið við það sem þar er, og það taka þeir til sín sem eiga. En við slíkar aðstæður þá finnst mér það ekki til eftirbreytni en ég verð þá að leyfa hæstvirtum fjármálaráðherra að svara fyrir það orðaval, hvernig hann orðar það.“

Hafnaði því að popúlismi hafi ráðið för

Það er ekki ofsögum sagt að þingmenn stjórnarandstöðunnar hafi brugðist hart við orðum Pawel en nokkrir þingmenn sátu á þingi þegar samgönguáætlun var samþykkt og svo aftur þegar fjárlög ársins 2017 voru samþykkt. Á meðal þeirra er Steinunn Þóra Árnadóttir, þingmaður Vinstri grænna:

„Ég get ekki orða bundist eftir síðustu ræðu því háttvirt Alþingi er auðvitað komið út á mjög svo hættulega braut ef þeir sem á eftir koma eru ekki bundnir af neinu af því sem hefur verið gert á undangengnum þingum. [...] Það Alþingi sem tekur við eftir kosningar er að sjálfsögðu alltaf bundið af þeim ákvörðunum sem hafa verið teknar og þá þurfa að koma til nýjar og breyttar ákvarðanir ef það á að hverfa frá þeirri stefnu. Annað væru að mínu mati fáránleg vinnubrögð og þá erum við komin á mjög hættulegar brautir með lýðræðið.“

Ásta Guðrún Helgadóttir, þingmaður Pírata, var einnig ósátt við orð Pawels:

„Þessi ummæli háttvirts þingmanns Pawel Bartoszek að við vorum bara að gera þetta í einhverjum popúlískum leik... Gerir háttvirtur þingmaður sér grein fyrir því hvernig stöðu vegakerfið er í? Það þarf um það bil tíu milljarða bara til þess að viðhalda hringveginum, þjóðvegi 1. Heldur hann virkilega að okkur hafi þótt eitthvað gaman í háttvirtri umhverfis-og samgöngunefnd að taka á móti Vegagerðinni og öllum sveitarfélögunum og sjá fram á það að þessi vegur og hinn vegurinn er að grotna niður? Nei, þetta er andvaraleysi, tilvistarkreppa einhverrar nýfrjálshyggjuríkisstjórnar um það að vilja ekki setja skatta, að vilja ekki eyða í það sem er sameiginlegt,“ sagði Ásta og bætti við að vegakerfið væri sameiginlegt.