Einbeittu sér að varnarleiknum

Íslenska kvennalandsliðið í handbolta tapaði stórt, 38-18, í seinni vináttulandsleiknum gegn Hollandi, silfurliðinu frá HM og EM, á laugardaginn.

Ísland spilaði mun betur í fyrri leiknum á föstudaginn sem tapaðist 23-20.

„Við fengum mikið út úr vikunni og einbeittum okkur mikið að varnarleiknum,“ sagði landsliðsþjálfarinn Axel Stefánsson í samtali við Fréttablaðið.

„Við spiluðum mjög góða vörn í leiknum á föstudagskvöldið. Svo vorum við að vinna með að fá fleiri hraðaupphlaup eftir góðan varnarleik. Við sköpuðum okkur mörg hraðaupphlaup en nýtingin var ekki nógu góð. Við þurfum að vinna með það,“ bætti Axel við.

Markvörðurinn Hafdís Renötudóttir lék sína fyrstu landsleiki um helgina. Hún spilaði stórvel í fyrri leiknum en átti, líkt og allir leikmenn íslenska liðsins, erfitt uppdráttar í seinni leiknum þar sem Hollendingar spiluðu á sínu sterkasta liði.

„Hún stóð sig frábærlega og var með rétt tæplega 50% markvörslu,“ sagði Axel sem valdi einnig Elínu Jónu Þorsteinsdóttur, markvörð Hauka. „Við vorum með tvo unga markverði og það var spennandi að sjá hvort þær gætu fylgt leiknum á föstudaginn eftir sem þær náðu því miður ekki. En þær eru báðar framtíðarmarkverðir.“