Nei þýðir nei, þýðir nei, þýðir nei

Heilbrigðisráðherra var þráspurður um það á Alþingi í dag hvort hann ætlaði að samþykkja frekari einkavæðingu í heilbrigðiskerfinu með því að heimila Klínikinni að reka einkasjúkrahús. En þótt ráðherrann þvertæki fyrir þetta, var eins og þingmenn stjórnarandstöðunnar tryðu ekki svörunum.

Pólitíkin tekur oft á sig undarlegar myndir. Í fyrirspurnatíma í dag mátti ætla að annað hvort heyrðu þingmenn illa eða heilbrigðisráðherra talaði óskýrt - en svo getur verið að allir heyri ágætlega og ráðherrann hafi talað nokkuð skýrt en menn kosið að hlusta ekki hver á annan.

Fimm þingmenn komust að með fyrirspurnir til ráðherra í óundirbúnum fyrirspurnum í dag og fjórir þeirra voru meira og minna allir með sömu spurningarnar til heilbrigðisráðherra varðandi hugsanlegt starfsleyfi til Klínikurinnar um rekstur einkasjúkrahúss.

Vitnaði í eldri ræðu ráðherra

Einar Brynjólfsson þingmaður Pírata vitnaði þingræðu Óttars Proppé heilbrigðisráðherra frá því hann var þingmaður í desember, þar sem hann sagði Bjarta framtíð hafa verið jákvæða gagnvart fjölbreyttu rekstrarformi í heilbrigðiskerfinu.

„Það er ekki laumuleg leið til að ljúga í gegn alræmdri og ískaldri einkavæðingu í kerfinu. Heldur þvert á móti,“ hafði Einar eftir Óttarri.

„Ég vil bara nota tækifærið til að taka fullkomlega undir með sjálfum mér og standa við þær fullyrðingar sem komu fram í ræðu minni 22. Desember,“ svaraði Óttarr.

Svör ráðherrans dugðu frænda hans Kolbeini Óttarssyni Proppé þingmanni Vinstri grænna ekki og fannst honum greinilega erfitt að fest hönd á stefnu frænda síns.

„Það á að vera hverjum þeim sem sest á ráðherrastól einfalt mál að segja hreint út hvort að viðkomandi sé fylgjandi því að sjúkrahús eða starfsemi af þessum toga sé í gangi, verði leyfð eða ekki,“ sagði Kolbeinn.

Styður ekki uppbyggingu á einkareknum sjúkrahúsum sem rekin eru í gróðaskyni

Ráðherra ítrekaði margsinnis í umræðunni að hann styddi, og það væri hluti af stefnu Bjartrar framtíðar, að sjálfseignarstofnanir kæmu að rekstri á ýmsum sviðum, sem hafi verið mikilvægur hluti af íslensku heilbrigðiskerfi.

„Hins vegar styð ég ekki og mun ekki styðja uppbyggingu á einkareknum sjúkrahúsum með heildstæðri þjónustu sem eru reknar í gróðaskyni,“ sagði Óttarr.

Það standi aftur á móti til að semja við sömu opinberu heilbrigðisstofnanir og áður ásamt augnaðgerðafyrirtæki um niðurskurð á biðlistum á þessu ári. Klínikin væri ekki þar á meðal. Unnið væri eftir áður gerðu rammasamkomulagi við Læknafélag Reykjavíkur í þessum efnum.

„Þar heyrir meðal annars ekki undir rekstur á margra daga legudeild. Til slíks þyrfti sérstaka samninga,“ sagði heilbrigðisráðherra. Það hafi hins vegar verið ágætur hluti af heilbrigðiskerfinu að minni aðgerðir geti farið fram á stofum sérfræðinga.

„En ég sé ekki að það yrði til heilla að dreifa kröftum heilbrigðiskerfisins með því að auka flóknari og meiri sjúkrahúsþjónustu hjá aðilum annars staðar en hjá þeim sjúkrahúsum og spítölum sem fyrir eru,“ sagði Óttarr Proppé.

Ráðherrann hafði í frétt á Vísi þegar í gær svarað fyrir söguburð um að hann hefði gengið til samninga við Klíníkina og rekstur á sjúkrastofnun.

Mótmælum gegn meintri einkavæðingu heilbrigðisráðherra sem boðað hafði verið til á Austurvelli í dag, var frestað vegna veðurs.