Sex þúsund vilja gjaldfrjáls námsgögn í grunnskólum

Hátt í sex þúsund manns hafa skorað á stjórnvöld að beita sér fyrir breytingu á grunnskólalögum þannig að námsgögn í grunnskólum verði gjaldfrjáls. Farið er fram á að óheimilt verði að krefja foreldra um innkaup á gögnum eða taka við greiðslu fyrir gögn sem nota á vegna skólagöngu barna.

Nemendur í níunda bekk Háteigsskóla ásamt framkvæmdastjóra Barnaheilla munu afhenda Kristjáni Þór Júlíussyni áskorunina í hádeginu í dag, en Barnaheill hafa frá árinu 2015 vakið athygli á kostnaði foreldra vegna innkaupa á námsgögnum grunnskólabarna.

Telja samtökin að slíkur kostnaður sé töluverður baggi á barnafjölskyldur en að jafnframt sé hann í ósamræmi við barnasáttmála Sameinuðu þjóðanna.

„Sáttmálinn var lögfestur á Íslandi 20. febrúar 2013 og gildir því sem lög hér á landi. Í 28. grein hans er börnum tryggð gjaldfrjáls grunnmenntun og er kostnaðarþátttaka foreldra því í raun ólögleg. Þess vegna er óásættanlegt að innkaupalistar skuli enn vera við lýði í flestum grunnskólum landsins,“ segir í tilkynningu frá samtökunum.

Þá er skorað á yfirvöld að vinna að þessum breytingum eins fljótt og auðið er svo innkaupalistar verði ekki sendir út fyrir næsta skólaár.