Vilja fleiri sálfræðinga í HÍ

Stúdentaráð Háskóla Íslands ætlar að beita sér fyrir fjölgun stöðugilda sálfræðinga við háskólans. Ráðið segir jafnframt að varpa þurfi ljósi á bága stöðu nemenda og skólans í þeim efnum.

Ráðið tekur fram í ályktun sinni að aldurshópurinn 18 til 25 ára sé sá hópur sem sé í hvað mestri hættu þegar komi að andlegum veikindum. Ungt fólk eigi hins vegar ekki margra kosta völ þegar komi að því að sækja sér þjónustu vegna andlegra veikinda þar sem fólk eldra en 18 ára eigi ekki rétt á niðurgreiddri sálfræðiþjónustu.

„Að öllu óbreyttu þykir algengast að einstaklingur með kvíða og þunglyndi þurfi að gera ráð fyrir 10-15 meðferðartímum hjá sálfræðingi hið minnsta. Bein útgjöld vegna slíkrar meðferðar eru á bilinu 120.000-220.000 krónur. Til samanburðar er síðarnefnda upphæðin um 30% af þeirri upphæð sem LÍN lánar einstaklingi í leiguhúsnæði að hámarki í framfærslu hverja önn. Þess vegna er ljóst að það reynist ungu námsfólki ómögulegt að leita sér aðstoðar sálfræðings miðað við þær upphæðir sem það hefur á milli handanna hverju sinni,“ segir í ályktun Stúdentaráðs.

Ályktunin var samþykkt í gær og mun skrifstofa SHÍ taka málið í vinnuferli. Hana má lesa í heild hér.