Kristinn Freyr með draumamark í tapi | Myndband

Kristinn Freyr Sigurðsson skoraði glæsilegt mark þegar Sundsvall beið lægri hlut fyrir Häcken, 1-2, í sænsku úrvalsdeildinni í fótbolta í dag.

Þetta var fyrsta mark Kristins Freys fyrir Sundsvall en hann er á sínu fyrsta tímabili hjá liðinu.

Häcken var 0-2 yfir í hálfleik en á 58. mínútu tók Kristinn Freyr boltann á lofti fyrir utan vítateig og þrumaði honum í slá og inn. Stórglæsilegt mark hjá Kristni.

Það dugði þó ekki til sigurs. Eftir að hafa unnið fyrsta leik sinn í sænsku deildinni hefur Sundsvall nú tapað tveimur leikjum í röð.

Kristinn Freyr spilaði allan leikinn fyrir Sundsvall. Nafni hans Steindórsson var einnig í byrjunarliðinu en var skipt af velli á 66. mínútu.