Áfram í haldi vegna gruns um að hafa misþyrmt barnsmóður sinni

Hæstiréttur hefur staðfest gæsluvarðhaldsúrskurð yfir manni sem í janúar var dæmdur í átta ára fangelsi fyrir tilraun til manndráps, nauðgun, frelsissviptingu og sérstaklega hættulega líkamsárás gegn barnsmóður sinni. Maðurinn hefur áfrýjað dómnum og verður  gert að sæta gæsluvarðhaldi á meðan mál hans er til meðferðar.

Manninum er gefið að sök að hafa svipt konuna frelsi hennar með því að halda henni nauðugri í íbúð hennar og beitt hana ofbeldi og hótunum. Þá er hann sakaður um að hafa nauðgað henni nokkrum sinnum, þvingað hana til að hafa við sig munnmök, beitt hana ofbeldi og hótað henni lífláti og líkamsmeiðingum.

Jafnframt hafi hann tekið hana kverkataki og hert að, kýlt hana margsinnis í andlit, höfuð og líkama,  hótað henni með því að þrýsta hnífi að hálsi hennar og hótað að stinga hana með hnífnum ef hún ekki þegði.

Í dómnum segir jafnframt að hann hafi barið höfði konunnar utan í vegg í sturtu á baðherbergi og skorið langan skurð á höku hennar. Þá hafi hann reynt að svipta konuna lífi með því að taka hana hálstaki þannig að hún náði ekki andanum og missti meðvitund stutta stund. Hálstakið hafi verið það þétt að konan hafi hlotið talsverðar blæðingar undir slímhúð beggja augna og útbreidda áverka framan á hálsi og rispur til hliðanna.

Mætti óboðinn með félaga sínum

Í greinargerð lögreglu sem fylgdi kröfunni um gæsluvarðhald síðastliðið sumar á grundvelli almannahagsmuna kom fram að maðurinn hefði komið um nóttina óboðinn heim til hennar ásamt öðrum manni sem konan þekkti ekki. Barnsfaðirinn hefði viljað að hún svæfi hjá þeim báðum en það vildi konan ekki. Sagði hún þeim að fara sem þeir gerðu.

Stuttu síðar kom barnsfaðir hennar aftur og bað um gistingu. Sagði konan að hann mætti gista á sófanum, hann fór fram en kom svo inn í svefnherbergið, réðst á konuna og nauðgaði henni.

Fundu blóð í íbúðinni

Þá segir jafnframt í greinargerðinni að samkvæmt skýrslu um réttarlæknisfræðilega skoðun hafi áverkar konunnar, sem voru um allan líkama hennar, verið í samræmi við frásögn hennar af atburðum. Þá hafi lögreglan séð blóðslettur víða um íbúðina, meðal annars í forstofu, á gangi við barnaherbergi, stofu og svefnherbergi.

Maðurinn neitaði sök í málinu og er lýsing hans á atburðum afar ólík lýsingum konunnar. Maðurinn var á skilorði þegar hann var handtekinn en hann hafði áður hlotið dóm fyrir ofbeldi gegn konunni.