Aron spjallaði frekar við Alfreð yfir úrslitaleiknum

Aron Pálmarsson sá lítið af úrslitaleik Vardar Skopje og PSG í Meistaradeildinni í handbolta á sunnudag, enda enn að jafna sig eftir vonbrigði laugardagsins þegar lið hans Veszprém tapaði í undanúrslitunum.

„Það var erfitt og grautfúlt að horfa á úrslitaleikinn. Enda gerði ég lítið af því og spjallaði þess í stað við Alfreð [Gíslason], minn gamla þjálfara [hjá Kiel],“ segir Aron.

Vardar Skopje kom flestum að óvörum með því að verða Evrópumeistari, Aroni meðtöldum. „Ef ég á að vera alveg hreinskilinn þá reiknaði ég ekki með þessu í upphafi tímabils.“

Vardar spilar með Veszprem í SEHA-deildinni svokölluðu, úrvalsdeild liða úr austurhluta Evrópu, og þekkir Aron því vel til bæði liðsins og þjálfarans Raul Gonzalez.

„Ég hef aðeins kynnst honum og þetta er frábær manneskja og algert handboltaséní. Hann hefur náð ótrúlegum árangri og þessi 5-1 vörn hans er þokkalegt meistarastykki. Hún skilaði titlinum en það skemmdi ekki fyrir að vera með besta markvörð heims [Arpad Sterbik] í markinu.“

Sterbik var eftir úrslitaleikinn útnefndur besti leikmaður úrslitahelgarinnar í Köln.