Gylfi Þór Sigurðsson opnar Norðurá

Gylfi Þór Sigurðsson knattspyrnukappi mun opna Norðurá auk einhverrar úr kvennalandsliðinu á morgun. Hins vegar hefur ekki tekist að ganga frá því hver og hvort vegna anna hjá liðinu. En, að sögn Einars Lúðvíkssonar, sem annast veiðileyfasölu í Norðurá, standa vonir til þess að einhver úr þeim frækna hópi sjái sér fært að mæta á árbakkann og sveifla stöng.

Opnun Norðurár markar í hugum margra upphaf laxveiðitímabilsins. Og er alla jafna nokkur spenna ríkjandi; hver muni njóta þess heiðurs að vera fyrstur til að henda flugu fyrir lax þar. Í fyrra voru það stórsöngvararnir Kristinn Sigmundsson og Kristján Jóhannsson, sem léku við hvurn sinn fingur. Þar áður voru það svo Bubbi Morthens og Björgvin Halldórsson. Og ef við förum enn eitt ár aftur í tímann þá voru það Sigmundur Davíð Gunnlaugsson og Bjarni Benediksson, foringjar ríkisstjórnarinnar þá, sem tróðu sér í vöðlurnar. Gylfi er að feta í fótspor mikilla foringja.

Ný og glæsileg aðstaða á bökkum Norðurár

Einar var kátur þegar Vísir ræddi við hann. Enda stendur mikið til. Ný aðstaða verður kynnt sérstaklega á morgun; nýtt og stórglæsilegt veiðihús verður tekið í notkun. Hluti þess gamla stendur en hitt var rifið.

„Fjórtán ný herbergi sem öll snúa út að ánni, ný vöðlugeymsla, gufa,“ segir Einar og þylur upp það sem prýðir húsakynni við Norðurá. „Gjörbylting. Við tökum þetta í notkun á morgun. Uppúr hálf nýju verður þetta sýnt. Síðan mun formaður veiðifélags norðurár afhenda mér formlega lyklana að húsinu, presturinn mun blessa húsið og stökkva vígðu vatni á húsið. Og síðan ganga menn til veiða. Á slaginu ellefu ætla ég að láta byrja,“ segir Einar.

Ekki bara fyrir einhverja útvalda

Eins og áður sagði þá vonast Einar til að einhver þeirra drottninga sem skipa íslenska kvennalandsliðið sjái sér fært að mæta auk Gylfa Þórs. „En, þær eru mjög uppteknar núna. Erfitt að ná þeim saman. En, þetta verður mjög skemmtilegt,“ segir Einar. Hann veit ekki hversu mikill fluguveiðimaður Gylfi Þór er. „En, hann hefur veitt og vafalaust kann hann eitthvað fyrir sér í þessu,“ segir Einar og ljóst að eftirvæntingin er að ná tökum á honum.

Hann segist vilja vekja athygli á því að stangveiðar eru mikilvægar fyrir þjóðarbúið, fjöldi fólks starfar við greinina og mörg afleidd störf tengist þessari starfsemi. „Þetta er stór grein og mér finnst vanta að fólk átti sig á því. Þá vil ég vekja athygli á þessu sem fjölskyldusporti, þetta er ekki bara fyrir einhverja fáeina útvalda.“