Geir: Við Guðjón vorum ekki bestu vinir um tíma

Einhverjir hafa kallað eftir því að Geir Sveinsson landsliðsþjálfari stokki enn frekar upp í landsliðinu og setji eldri menn út fyrir nýja. Þar er verið að tala um Guðjón Val Sigurðsson, Ásgeir Örn Hallgrímsson og Arnór Atlason.

„Frammistaða þeirra gegn Úkraínu var frábær og það kom enginn til mín eftir leik og sagðist vera hættur. Ég veit ekki betur en það sé nokkurn bilbug á þeim að finna,“ segir Geir en hann hefur minnkað leiktíma þeirra allra og þeir eru í raun í öðrum hlutverkum.

„Í vinstra horninu hef ég reynt að fjölga og aðallega að menn upplifi ekki að Guðjón sé þarna sama hvað gerist. Ég átti mjög hreinskilið samtal við Guðjón í desember. Það er allt gott á milli okkar og ég er einstaklega ánægður með hans framlag en hann hefur stigið mikið upp sem fyrirliði. Ég kallaði svolítið eftir því. Við áttum hreinskilið spjall og um tíma vorum við kannski ekki bestu vinir þó svo það væri ekkert slæmt á milli okkar. Við tókumst aðeins á og það skilaði sér í margfalt öflugri Guðjóni finnst mér. Hann er frábær fyrirmynd og enn í dag einn sá besti í heimi.“

Geir hrósar einnig Arnóri og Ásgeiri fyrir þeirra framlag og ekki síst viðhorf.

„Þeir tóku á móti ungu drengjunum á HM og aðstoðuðu þá í hvívetna þó svo þeir væru að finna að þeir væru ekki eins ómissandi og áður,“ segir Geir og ljóst að honum finnst mikið til þeirra koma.

„Arnór hefur bakkað þá menn upp á miðjunni sem eru að spila á undan honum og leyst miðjustöðuna þegar við erum manni fleiri og færri. Ég hef sjaldan séð Ásgeir í eins góðu formi. Hann er frábær í vörninni og leysir hornið meira en skyttuna núna. Hluverk þeirra hafa breyst, þeir taka því mjög vel og gera það vel. Þetta eru eðaldrengir. Þú finnur ekki betri eintök.“