Aron biður Tromsö að komast að samkomulagi við Twente

Aron Sigurðarson hefur beðið forráðamenn Tromsö í Noregi um að reyna að komast að samkomulagi við Twente um félagaskipti hans.

Landsliðsmaðurinn var í viðtali við itromso.no þar sem hann greinir frá fundi hans við íþróttastjóra Tromsö.

„Við áttum gott spjall saman. Hann sagði mér hvert sjónarmið félagsins er og ég lét mínar skoðanir í ljós. Þetta er í ferli og þeir ætla að reyna að tala við Twente aftur,“ segir Aron í viðtalinu.

„Þeir vissu hvar ég stóð þegar ég kom. Ég hef aldrei farið leynt með það að ég vil komast í stærri deild. Það mun auka líkur mínar á tryggja sæti mitt í landsliðinu og ég hef alltaf dreymt um að spila í Hollandi.“

„Ef ekki næst samkomulag um verð, þá er lítið sem ég get gert. Ég er samningsbundin Tromsö. Ég er ekki búin að ganga svo langt að fara fram á sölu, en lét félagið vita að þetta er eitthvað sem ég vil gangi í gegn. Þeir sögðu að þeir þurfi hærri upphæð en það sem Twente hefur boðið svo við verðum að sjá til hvað gerist.“

Hinn 23 ára gamli Aron fór til Tromsö á síðasta ári frá uppeldisfélagi sínu Fjölni. Hann á að baki fimm leiki með íslenska landsliðinu þar sem hann hefur skorað tvö mörk.