AGS spáir minni hagvexti á Bretlandi og í Bandaríkjunum

Hagkerfi Bretlands og Bandaríkjanna munu vaxa minna á þessu ári en áður hafði verið spáð. Þetta er niðurstaða nýrrar úttektar Alþjóðagjaldeyrissjóðsins (AGS). Spá sjóðsins um áframhaldandi hagvöxt á heimsvísu er þó óbreytt.

Minni umsvif en gert hafði verið ráð fyrir á fyrsta ársfjórðungi er ástæða þess að AGS spáir nú 1,7% hagvexti á Bretlandi í stað 2% áður og 2,1% hagvexti í Bandaríkjunum í stað 2,3% áður.

Á heimsvísu spáir sjóðurinn enn 3,5% hagvexti á þessu ári og 3,6% á því næsta samkvæmt frétt breska ríkisútvarpsins BBC.

AGS sér fram á betri horfur fyrir nokkur Evruríki en hann hafði áður spáð, þar á meðal í Frakklandi, Þýskalandi, Ítalíu og Spáni þar sem nú er gert ráð fyrir meiri hagvexti.

Hagvaxtarspáin fyrir árið 2018 í Bretlandi er óbreytt í 1,5% en AGS hefur lækkað spána fyrir Bandaríkin úr 2,5% í 2,1%.