Íbúar Laugarneshverfis ósáttir við að dæmdur kynferðisbrotamaður dvelji á Vernd

Fyrir hálfu ári var átján ára piltur dæmdur í fimm og hálfs árs fangelsi fyrir að nauðga tveimur fimmtán ára stúlkum. Brotin áttu sér stað síðasta sumar og voru árásirnar afar hrottalegar.

DV greindi frá málinu í gær og hafði fengið staðfest að maðurinn hafi lokið afplánun í fangelsi og dvelji nú á áfangaheimlinu Vernd en samkvæmt lögum geta afbrotamenn sem eru yngri en 21 árs fengið reynslulausn fyrr en aðrir fangar.

Mikil umræða hefur skapast um málið á Facebook-síðu íbúa Laugarneshverfis.

„Það er bara mjög mikil óánægja með það. Sjálf bý ég við hliðina og á tvö ung börn og mér finnst mjög óhugnalegt að þessi maður skuli vera kominn þangað," segir Ninna Karla Katrínardóttir, íbúi í Laugarneshverfi.

Íbúum finnst sérstaklega óhugnalegt hve fljótt maðurinn er kominn meðal almennings eftir brotin.

„Ég trúi á að allir eigi rétt á öðru tækifæri en mér finnst að hann eigi að sitja lengur inni eftir þessi brot," segir Ninna og bætir við að það séu börn í hverju húsi í hverfinu. „Mér er sama hverjir eru þarna inni á Vernd svo lengi sem það eru ekki barnaníðingar."

Íbúar hverfisins hafa sent Páli Winkel fangelsismálastjóra kvartanir vegna málsins en ekki náðist í hann við vinnslu fréttarinnar.

„Svo hefur skapast umræða um að vera með undirskriftarlista og ég ætla að skrifa undir þann lista. Alveg hiklaust.“