Ólafía féll um tvö sæti á peningalistanum

Ólafía Þórunn Kristinsdóttir datt niður um tvö sæti á peningalista LPGA-mótaraðarinnar eftir að Opna breska meistaramótinu í golfi lauk um helgina.

Ólafía komst ekki í gegnum niðurskurðinn og fékk því ekkert verðlaunafé fyrir mótið. Hún stendur því enn í 65.140 dollurum og er nú tólf þúsun dollurum frá 100. sætinu.

100 efstu kylfingarnir á peningalistanum endurnýja þátttökurétt sinn á mótaröðinni fyrir næsta keppnistímabil.

So Yeon Ryu frá Suður-Kóreu er í efsta sæti listans með 1,7 milljónir dollara en In-Kyung Kim, sem vann Opna breska um helgina, er í fjórða sætinu með 1,08 milljónir. Þar af fékk hún rúma hálfa milljón fyrir sigurinn í Skotlandi um helgina.

Ólafía fær nú frí næstu vikurnar en bestu kylfingar eru nú að undirbúa sig fyrir Solheim-bikarinn, keppni Bandaríkjanna og Evrópu. Mótið í ár fer fram í Iowa í Bandaríkjunum.

Næsta mót á LPGA-mótaröðinni er opna kanadíska meistaramótið sem fer fram í Ontario helgina 24.-27. ágúst.