Viðar Örn skoraði í tvígang

Viðar Örn Kjartansson skoraði bæði mörk Maccabi Tel Aviv í 2-0 sigri á Sakhnin í ísraelsku úrvalsdeildinni í dag.

Var þetta annar sigur Maccabi í röð eftir tap gegn Beitar Jerusalem í fyrstu umferð og er Maccabi því með sex stig að þremur umferðum loknum.

Viðar kom Maccabi yfir á 59. mínútu með fyrsta marki sínu á tímabilinu í ísraelsku deildinni en hann bætti við öðru marki sínu á 73. mínútu. Reyndist það síðasta mark leiksins.

Viðar er því kominn á blað í deildinni með tveimur mörkum en hann hefur verið duglegur að skora fyrir ísraelska liðið í Evrópudeildinni í upphafi tímabilsins.