Eitrað fyrir heimilisketti á Selfossi: „Hún var svo kvalin“

Bergþóra Stefánsdóttir, íbúi á Selfossi, leitar þess sem eitraði fyrir fjölskyldukettinum Ösku. Í viðtali í Reykjavík síðdegis á Bylgjunni í dag segir hún að dýralæknir hafi staðfest að eitrað hafi verið fyrir kettinum með frostlegi. Svæfa þurfti köttinn í dag. 

„Við fórum með hann í morgun þar sem okkur leist ekki á blikuna“

Bergþóra lét skoða köttinn um leið og dýraspítalinn opnaði í morgun.

„Þeir tóku blóðsýni sem að staðfesti það að það væri um eitrun að ræða. Hún var líka með blóð í munni.“

Kötturinn var einnig með mikla nýrnabilun.

„Það er notaður frostlögur sem veldur mjög kvalarfullum dauðdaga,“ svarar Bergþóra aðspurð um það hvað hafi verið notað til þess að eitra fyrir kettinum.

„Frostlögur er góður á bragðið, hann er sætur þannig að þeim finnst hann góður.“

Átta ára stúlka átti köttinn

Kötturinn Aska verður krufinn hjá dýralækni. „Hún er öll. Við vorum bara að koma frá því að segja bless.“

Átta ára dóttir Bergþóru átti kisuna og fékk hún tækifæri til þess að kveðja hana.

„Svo var hún bara svæfð, það var í raun ekki hægt að bíða lengur því hún var svo kvalin“

Bergþóra segir að dóttir sín hafi tekið þessu mjög illa enda sé mjög erfitt fyrir átta ára gamalt barn að missa gæludýrið sitt.

„Hún var búin að bíða svo lengi eftir því að fá kisu.“

Staðbundið við Suðurland

Bergþóra hefur heyrt um fleiri svona dæmi úr nágrenni fjölskyldunnar.

„Þetta er víst að gerast á fleiri stöðum á Selfossi, Stokkseyri og Hveragerði.“ Hún segir að dýralæknirinn hefði sagt að þessar eitranir virtust staðbundnar við Suðurland. 

Bergþóra auglýsir nú á Facebook eftir „mannfýlunni“ sem hafi eitrað fyrir ketti fjölskyldunnar. Hún segir í viðtalinu að kettirnir verði mjög máttfarnir eftir að þeir innbyrða eitrið. Hún hefði ekki komið heim í gærkvöldi.

„Ég labbaði um hverfið og fann hana í runna.“

Viðtalið má hlusta á í heild sinni í spilaranum hér fyrir ofan.