Hörður enn ófundinn tveimur árum síðar

Hörður Björnsson, sem hvarf sporlaust 14. október árið 2015, er enn ófundinn. Hann sást síðast á Laugarásvegi í Reykjavík en um tíma var talið að hann væri í nágrenni við Hveragerði en leit þar leiddi ekkert í ljós.

Umfangsmikil leit var gerð að Herði þar sem björgunarsveitir notuðu öll þau verkfæri sem þær höfðu tiltækar við leitina, bíla, sporhunda, dróna, þyrlu og fjölda leitarmanna á jörðu niðri, auk þess sem auglýst var eftir honum í fjölmiðlum.

Aðstandendur Harðar birtu andlátstilkynningu í Fréttablaðinu í dag þar sem kom fram að útför Harðar hefði farið fram í kyrrþey síðastliðinn laugardag, tveimur árum frá því hann sást síðast. Í tilkynningunni kemur fram að þeir sem vilja minnast Harðar er bent á geðdeild Landspítalans, Laugarási, úrræði fyrir ungt fólk.

Ágúst Svansson, sem stýrir rannsóknum á mannshvörfum hjá lögreglunni, segir Hörð því miður enn ófundinn. Ágúst segir lögreglu úrskurða þá látna sem eru ófundnir þremur árum eftir að lýst var eftir þeim.