Domino's Körfuboltakvöld: Dýrir tapaðir boltar hjá Stjörnunni

Stjarnan tapaði fyrir nýliðum Vals 110-104 í framlengdum leik í Valshöllinni í gærkvöld.

Valsmenn jöfnuðu leikinn á síðustu sekúndum venjulegs leiktíma og voru svo sterkari í framlengingunni.

Stjarnan hefur ekki verið sannfærandi það sem af er tímabils, en eins og staðan er í dag kæmist liðið ekki í úrslitakeppnina.

Sérfræðingar Domino's Körfuboltakvölds ræddu Stjörnuna, og ástandið þar, í gær.

„Þetta er algjört efnahagshrun,“ sagði Kristinn Geir Friðriksson.

„Svo ódýrir tapaðir boltar, 16 svoleiðis. Af þeim hafa örugglega verið 8-9 sem voru algjört prump,“ sagði Hermann Hauksson.

Stjarnan er með 14 bolta tapaða að meðaltali í leik í þeim sex leikjum sem búnir eru.

„Skref er ein tegund af töpuðum boltum. En að henda boltanum á andstæðing þar sem hann grípur boltann í átt að körfunni þinni, það eru eiginlega tvö gefin stig,“ sagði Kjartan Atli Kjartansson.

„Þetta eru dýrir tapaðir boltar.“

Umræðuna í heild sinni má sjá í spilaranum hér að ofan.