ASÍ ætlar að þvinga Primera Air að samningaborðinu

Lögfræðingur Alþýðusambandsins segir engum vafa undirorpið að Primera Air starfi á íslenskum vinnumarkaði og farið verði í aðgerðir til að þvinga félagið til kjarasamninga við flugliða. Fjórir fundir hafa verið haldnir hjá Ríkissáttasemjara án þess að fulltrúar Primera hafi látið sjá sig á þeim fundum.

Félagsdómur úrskurðaði í nóvember að boðuð vinnustöðvun Flugfreyjufélags Íslands væri ólögmætt þar sem deilu félagsins við Primera Air hefði aldrei verið vísað til Ríkissáttasemjara til úrlausnar.

Forráðamenn Primera telja sig ekki vera á íslenskum vinnumarkaði. Félagið hafi heldur enga flugliða á launaskrá og því séu engir starfsmenn hjá félaginu félagar í Flugfreyjufélagi Íslands. Þess vegna sé ekki um neitt að semja við Primera Air á Íslandi.

Magnús Norðdahl lögfræðingur Alþýðusambandsins segir persónuverndarlög verja aðild fólks að verkalýðsfélögum.

„Verkalýðshreyfingin er nú einmitt starfandi og verkalýðsfélög voru stofnuð til þess að verja einstaklinga. Þannig að þú þurfir ekki að etja einstaklingum fram í átökum við atvinnurekendur. Þess vegna semjum við sameiginlega í kjarasamningum. Þess vegna er það að krefjast að lagðir séu fram nafnalistar yfir félagsmenn í Flugfreyjufélaginu í þessu sambandi  fáránlegt,“ segir Magnús.

Þegar reynt er að ná sambandi við fyrirtækið svarar þjónustufulltrúi í útlöndum sem veit ekki hvort Primera hafi yfirleitt skrifstofu, hvar hún þá væri og hefur engar upplýsingar um hvernig hægt væri að ná sambandi við forráðamenn fyrirtækisins.

Bryndís Hlöðversdóttir ríkissáttasemjari segir Primera ekki hafa sent fulltrúa sína á fjóra boðaða samningafundi með fulltrúum Flugfreyjufélagins hjá Ríkissáttasemjara.

„Vandinn í þessu máli er þessi ágreiningur um hvort að fyrirtækið tilheyri íslenskum vinnumarkaði. Ég vonast til að úr honum verði leyst fyrr eða síðar. Það er ekki á mínu borði. Það yrði væntanlega Félagsdómur sem myndi skera úr um það. Vonandi skýrist það  fyrr en síðar og við kannski metum okkar stöðu líka í ljósi þess,“ segir Bryndís.

Í yfirlýsingu boðar Primera einmitt að félagið muni vísa málinu til Félagsdóms en næsti samningafundur hefur verið boðaður hinn 7. febrúar.

Segir Primera eiga að lúta sömu reglum og önnur flugfélög

Félagið fær alla sína flugliða í gegnum erlenda starfsmannaleigu sem Magnús Norðdahl segir Alþýðusambandinu ekki hafa tekist að finna.

„Við teljum að þeir séu á íslenskum vinnumarkaði einfaldlega vegna þess að þetta er fyrirtæki skráð á evrópska efnahagssvæðinu sem kemur til Íslands til að veita þjónustu á Íslandi og frá Íslandi. Er hér með starfsmenn í tvo til þrjá mánuði í einu. Er að fljúga farþegum frá Íslandi og til baka í nákvæmlega sömu starfsemi og aðrir eru að rækja hér á Íslandi. Sem telja sig og heyra undir íslenskan vinnumarkað. Um þá gilda bara ekkert aðrar reglur en um önnur fyrirtæki sem starfa á Íslandi,“ segir Magnús.

Önnur erlend flugfélög sem fljúgi til Íslands skrái sig í öðrum löndum og geri starfsemi sína út frá þeim og fari að lögum þeirra landa. En Primera geri út frá Íslandi varðandi flug þaðan.

Hvað getur það gengið lengi að einungis annar aðilinn mæti til samningafunda?

„Að lokum kemur að því að aðili sest til samninga. Til þess þarf þá að þvinga hann. Það er það sem er í gangi núna og við erum að undirbúa að það verði farið af stað að nýju með verkfallsaðgerðir á hendur þessu fyrirtæki,“ segir Magnús. Boðað verði til þeirra aðgerða á næstunni.