Fimmtán mánuðir fyrir brot gegn barnabarni

Héraðsdómur Reykjavíkur hefur dæmt karlmann í fimmtán mánaða fangelsi fyrir ítrekuð kynferðisbrot gegn sonardóttur sinni. Stúlkan var á aldrinum ellefu til þrettán ára þegar brotin áttu sér stað frá 2013 til 2015.

Brotin áttu sér ýmist stað í orlofsíbúð, á heimili barnabarnsins og á heimili afans. Hann hafi í að minnsta kosti þrjú skipti áreitt stúlkuna, meðal annars með því að strjúka kynfæri hennar innanklæða.

Stúlkan greindi foreldrum sínum fyrst frá brotum mannsins í nóvember 2015. Þá hafi hún átt að gista hjá honum en ekki viljað fara. Hún hefði farið inn í herbergið sitt og sent foreldrum sínum skilaboð á Facebook um að hann hefði komið óþægilega við sig á kynfærum. Hún hefði einnig lýst áhyggjum af því að litla systir hennar hefði líka orðið fyrir þessu.

Í dómnum kemur fram að stúlkan hafi greint frá því að þetta hafi gerst fjórum til fimm sinnum síðustu tvö árin á undan. Það hafi ýmist verið á heimili afa hennar eða hennar. Eitt skiptið hafi verið 2013 í sumarbústað.

Hefur átt erfitt uppdráttar eftir brotin

Vanlíðan stúlkunnar í kjölfar brotanna er lýst í dómnum. Hún hafi byrjað að skrópa úr skólanum, átt erfitt með að einbeita sér og sagt móður sinni að hún væri endalaust að hugsa um ætlað kynferðisbrot, héldi að hún væri „ónýt“, væri mjög óttaslegin að mæta ákærða og ætti erfitt með að sofna á kvöldin vegna eigin hugsana.

Þá er lýst atviki um jólin 2016 þegar stúlkan vildi ekki fara í jólaboð. Hún hafi grátið mikið og viljað vera ein heima. Hún hafi sagt ástæðuna vera breytt viðhorf ættingja til hennar, en sumir forðuðust hana og vissu ekki hvernig þeir ættu að vera nálægt henni.

Leiddist stúlkan meðal annars út í neyslu fíkniefna í kjölfarið.

Misræmi í framburði afans

Í skýrslutökum hjá lögreglu kannaðist maðurinn við að eitthvað væri til í ásökunum stúlkunnar. Hann hefði í einhver skipti farið inn fyrir klæði hennar. Bar hanns hins vegar við að hann minntist atvikanna óljóst eða ekki. Hann hefði ekki haft ásetning um að leita á stúlkuna.

Fyrir dómi bar maðurinn hins vegar að hann kannaðist ekki við neitt af því sem stúlkan bar um. Neitaði hann að hafa strokið stúlkunna á kynfærum. Útskýrði hann misræmið í framburði með því að hann hefði verið í áfalli við skýrslutökuna og ekki munað atburði vel.

Braust trúnaðarskyldum gagnvart stúlkunni

Héraðsdómur taldi framburð stúlkunnar skýran, afdráttarlausan og mjög trúverðugan. Á móti væri framburður afans óljós og reikull um hvort hann hefði snert stúlkuna og hversu oft það hefði gerst.

Brotum mannsins er lýst sem alvarlegum. Hann hafi brugðist trúnaðarskyldum sínum gagnvart stúlkunni. Refsing hans var ákvörðuð fimmtán mánaða fangelsi og var þar tekið tillit til tafa á á málinu sem voru manninum ekki að kenna.

Þá var maðurinn dæmdur til að greiða stúlkunni 1,2 milljónir króna í bætur auk málsvarnarlauna verjanda síns og þóknun réttargæslumanns stúlkunnar, alls um 1,5 milljónir króna.