Valdís áfram eftir skrautlegan hring en Ólafía er úr leik

Valdís Þóra Jónsdóttir átti skrautlegan annan hring á opna ástralska mótinu í golfi í nótt en hún kom í hús á 72 höggum á á pari vallarins.

Skagamærin fékk fimm fugla og örn en á móti fékk hún þrjá skolla og tvo skramba. Ansi mikið að gerast á hringnum hjá Valdísi.

Valdís er í heildina á pari vallarins þar sem hún spilaði fyrsta hringinn einnig á 72 höggum og er komin í gegnum niðurskurðinn sem miðast við þrjú högg yfir parið.

Ólafía Þórunn Kristinsdóttir er aftur á móti úr leik á mótinu eftir skelfilegan annan hring þar sem hún fékk hvern skollann á fætur öðrum.

Ólafía spilaði fyrsta hringinn á tveimur höggum yfir pari en kom í hús á 77 höggum eða fimm höggum yfir pari í dag og er í heildina á sjö höggum yfir pari.

Íþróttamaður ársins fékk tvo fugla en sjö skolla og er ansi langt frá niðurskurðarlínunni.

Það verður því Valdís Þóra sem heldur áfram leik en Ólafía er á heimleið.