„Meinfýsi, mannfyrirlitning og ótrúleg rætni“

Páll Magnússon er furðu lostinn yfir pistlaskrifum Braga Páls Sigurðssonar sem birtust í Stundinni. Hann segir Braga Pál hinn nýja endaþarm íslenskrar blaðamennsku og að pistillinn sé meinfýsinn, hlaðinn mannfyrirlitningu og ótrúlegri rætni.

Bragi Páll lagði sem sagt leið sína á Landsfund Sjálfstæðismanna og lýsti upplifun sinni sem var heldur nöturleg. Pistill hans hefur vakið mikla athygli, trónir efst á lista yfir mest lesið efni Stundarinnar og á meðan einarðir andstæðingar Sjálfstæðisflokksins eru ákaflega hrifnir, verður ekki það hið sama sagt um Sjálfstæðismenn og velunnara flokksins.

Enginn húmor bara meinfýsni

Páll greinir stuttlega frá upplifun sinni af Landsfundinum, og tekur svo nokkur dæmi úr pistli Braga Páls sem er undir yfirskriftinni „Árshátíð andlega gjaldþrota auðmanna“.

Páll vitnar meðal annars í þetta í grein Braga Páls:

„Framan á henni er risavaxinn, gylltur fasista-örninn með spilltan vængfaðminn útbreiddan. Undir lófaklappinu hvíslaði hann út um gogginn „leyfið barnaníðingunum að koma til mín“.

Og: „… eftir að ljóstrað var upp um að Sjálfstæðisflokkurinn hafði einnig verið í samstarfi við barnaníðinga um allt land um að hreinsa mannorð þeirra“.

Páll telur þetta fyrir neðan allar hellur.

„Í þessu felst enginn húmor, engin kaldhæðni, engin stílfimi. Ekkert nema meinfýsi, mannfyrirlitning og ótrúleg rætni. Höfundurinn og miðillinn geta nú sameiginlega talist sjálfskipaðir handhafar „sæmdarheitisins“ sem gamall ritstjóri fann upp af öðru tilefni: endaþarmur íslenskrar blaðamennsku.“

Uppfært 14:00

Hreinn óþverri

Jón Trausti Reynisson, annar ritstjóra Stundarinnar, hefur skrifað athugasemd við pistil Páls og bendir þar á að Bragi Páll sé sjálfstæður pistlahöfundur; „en ekki hluti af fastri ritstjórn Stundarinnar, og fékk fullt frelsi til að skrifa sína ádeilu um landsfundinn. Það að þingmaður uppnefni hóp endaþarm er sannarlega sorglegt fordæmi. Ritstjórn Stundarinnar hlaut meðal annars blaðamannaverðlaun ársins 2017 á dögunum. Háðsk pistlaskrif lúta öðrum lögmálum en ritstjórnarskrif og best að taka þeim af yfirvegun og takmarkaðri alvöru.“

Páll Magnússon lætur þetta ekki slá sig út af laginu ekki hætis hót heldur gefur í ef eitthvað er. Og vandar um við ristjórann. Segist hafa séð Pál Braga titlaðan blaðamann Stundarinnar einhvers staðar á netinu.

„Gott að svo er ekki. Það breytir því þó ekki að Stundin birti þennan viðbjóð og skal hirða skömmina fyrir það.

Þetta voru nefnilega ekki „háðsk pistlaskrif“ heldur hreinn óþverri.

Hugleiddu muninn á þessu tvennu Jón Trausti - og svo skaltu biðjast afsökunar.“

Braga Páli úthúðað á vegg Páls

Fjölmargir taka undir með Páli og eru pistlahöfundinum ekki vandaðar kveðjurnar. Eins og ein stykkprufa sýnir vel tóninn á Facebokkvegg þingmannsins: „Þetta er nú eitt mesta ógeð sem ég hef séð skrifað. Mannauminginn hlýtur að vera mjög alvarlega sjúkur!“ skrifar Sólon Sigurðsson fyrrverandi bankastjóri.

Guðlaugur Þór Þórðarson utanríkisráðherra er svo einn hinna fjölmörgu sem setja „læk“ við færslu Páls. Og blaðamaður Morgunblaðsins, Sigurður Bogi Sævarsson bendir á eftirfarandi: „Til frekari upplýsinga má geta þess að faðir Braga er Sigurður Páll Jónsson þingmaður Miðflokksins.“ Og sjónvarpsmaðurinn Egill Helgason segir þetta ekki skemmtileg skrif.