Með Gylfa inná í 99,95 prósent af keppnisleikjum okkar frá október 2014

Ef íslenska landsliðið þekkir eina stöðu ekki vel þá er það að spila án Gylfa Þórs Sigurðssonar.

Gylfi meiddist á hné í leik með Everton í ensku úrvalsdeildinni um helgina og það lítur út fyrir að HM sé í hættu hjá lykilmanni íslenska landsliðsins.

Gylfi hefur verið fyrsti maðurinn á skýrslu í íslenska landsliðinu í mörg ár og hefur forðast alvarleg meiðsli allan þennan tíma. Nú virðast lukkudísirnar hafa yfirgefið okkar besta knattspyrnumann. Um leið er komin upp staða sem landsliðið þekkir ekki - að spila án Gylfa.

Íslenska landsliðið hefur spilað 23 keppnisleiki í undankeppni HM, úrslitakeppni EM og undankeppni EM frá því í október 2014.

Gylfi hefur verið inná í 2069 mínútur af 2070 eða í 99,95 prósent leiktímans. Eina mínútan sem hann missti af var þegar hann fékk heiðursskiptingu í uppbótartíma á móti Úkraínu á Laugardalsvellinum 5. september 2017.

Gylfi hafði þá afgreidd Úkraínumenn með tveimur mörkum og var tekinn af velli í blálokin þegar leikurinn var búinn. Sú mínúta segir okkur því ekki neitt en jafnframt í eina skiptið sem Heimir Hallgrímsson hefur tekið Gylfa að velli í keppnisleik síðan að Lars Lagerbäck hætti með liðið.

Það þarf síðan að fara alla leið aftur til 10. október 2014 til að finna næstu mínútu sem Gylfi missti af en hann var þá tekinn af velli tíu mínútum fyrir leikslok í 3-0 sigurleik úti í Lettlandi.

Gylfi hafði skorað fyrsta mark leiksins á 66. mínútu og staðan var 2-0 þegar hann fór af velli fyrir Ólaf Inga Skúlason.

Gylfi var líka tekinn af velli rétt fyrir leikslok í 3-0 sigurleik á Tyrkjum á Laugardalsvellinum mánuði fyrr en hann hafði þá bæði skorað og lagt upp mark í leiknum og var skipt útaf á 89. mínútu fyrir umræddan Ólaf Inga Skúlason.

Frá því að Gylfi missti af leik á móti Slóveníu vegna leikbanns í júní 2014 þá hefur hann spilað 2770 af 2790 mínútum í boði í keppnisleikjum íslenska landsliðsins í undankeppnum eða úrslitakeppnum stórmótanna tveggja.