Ferjuferðin sem aldrei var farin

Fyrirhuguð HM-ferjusigling hefur verið slegin af. Dræm þátttaka í siglingu um Rússland á leiki íslenska liðsins er ástæðan. Ekkert verður því af fyrirhugaðri skemmtifljótasiglingu um Don og Volgu.

Ásgeir Halldórsson hefur sent frá sér sérstaka yfirlýsingu í Facebookhóp manna sem hugðust sigla um Rússland á leiki íslenska liðsins.

Svekktur með að ekki hafi verið meiri eftirspurn

„Kæru Fjelagar. Vegna lélegrar skráningar þá sýnist mér við verða að aflýsa siglingunni. Sorglegt en satt. Trúi þessu varla að undirtektir hafi ekki verið betri,“ segir Ásgeir í tilkynningu sinni.

Og skal engan undra að Ásgeir sé sársvekktur því sannarlega hljómaði hugmyndin vel eins og Vísir lýsti skilmerkilega í janúar. Um var að ræða ferjuna Dmitry Furmanov sem tekur um 300 manns. Leigja mátti káetu, lítil herbergi eða lúxusherbergi. Hægt verður að horfa á leikina á HM á skjám um borð í bátnum. Þá er allur matur innifalinn, morgunmatur, hádegismatur og kvöldmatur, auk þess sem drykkir verða á góðum kjörum, óáfengir sem áfengir.

Verða að leita annarra leiða en með ferju

En, Ásgeir segir að fimmtíu prósenta bókun sé bara ekki nóg með þessum fyrirvara.

„Svona siglingu þarf að skipuleggja með góðum fyrirvara og útgerðin þurfti að fara að fá sína fyrirframgreiðslu. Einsog við lofuðum þá ætluðum við ekki að stofna fjármunum neins í hættu. Ekki 1 króna hefur verið millifærð til Rússlands og mun Haukur hjá Bjarmalandi umsvifalaust endurgreiða því góða og áhugasama fólki sem var búið að greiða heildar og fyrirframgreiðslur inná siglinguna.

Ég óska öllum góðs gengis að skipuleggja nýa ferð á HM 2018 í Rússlandi. Til þess að koma ekki neinum í klípu þá er hreinlegast að aflýsa siglingunni strax til að fólk geti skipulagt sig uppá nýtt,“ segir Ásgeir með kveðju.

Ferjuferðin sem aldrei var farin

Vísi tókst ekki að ná tali af Ásgeiri þannig að ekki liggur nákvæmlega fyrir hversu margir voru búnir að panta sér far með ferjunni. En, í frétt Vísis frá í Janúar er talað um að til standi að leigja 300 manna ferju. Í ljósi þess að ekki náðist að bóka 50 prósent má slá á að í kringum hundrað manns hafi ætlað sér að fara um Rússland á ferju og fylgjast með HM. Þeir verða nú að leita annarra leiða.

Hafdís Nína Hafsteinsdóttir er ein þeirra sem grætur ferjuferðina sem aldrei var farin. Hún talar fyrir hönd margra: „Dapurleg niðurstaða óskiljanlegt að ekki náðist að fylla i þessa siglingu. þetta er svo frábær lausn á því vandamáli sem vegalengdirnar á milli borganna eru varla nennir maður að fara hanga í lest klukkutímum/sólarhringum saman. Takk samt fyrir að hugsa út fyrir boxið og koma fram með þessa frábæru hugmynd,“ segir Hafdís Nína.