Salah bestur í þriðja sinn í vetur

Mohamed Salah, leikmaður Liverpool, var í dag valinn besti leikmaður ensku úrvalsdeildarinnar í mars.

Þetta er í þriðja sinn í vetur sem Salah er valinn sá besti.Hann var einnig bestur í nóvember og febrúar. Hann er því að taka verðlaunin annan mánuðinn í röð.

Það þarf ekkert að koma á óvart þar sem hann hefur algjörlega farið á kostum í búningi Liverpool. Hann skoraði sex mörk og gaf eina stoðsendingu í fjórum leikjum Liverpool í mars.

Salah er sjötti leikmaðurinn sem nær að vinna tvo mánuði í röð. Hinir eru Robbie Fowler, Dennis Bergkamp, Cristiano Ronaldo, Harry Kane og Jamie Vardy. Þokkalegur félagsskapur það.