Fasteignaverð hækkað mikið í stærri bæjum úti á landi

Þegar litið er á hækkun fasteignaverðs á einu ári, það er frá fyrsta ársfjórðungi 2017 til fyrsta ársfjórðungs 2018, kemur í ljós að hún hefur verið mun meiri í fjórum stærstu bæjum landsins en Reykjavík.

Hækkunin var þannig langmest á Akranesi og svo í Árborg, en svipuð á Akureyri og í Reykjanesbæ. Var hækkun fasteignaverðs mun minni en í Reykjavík og þá væntanlega enn lægri á höfuðborgarsvæðinu í heild.

Þetta kemur fram í nýrri Hagsjá Landsbankans sem kom út í dag. Þar segir að niðurstöður mælinga Hagstofunnar á hækkun fasteignaverðs á landsbyggðinni hafi komið verulega á óvart í janúar og í mars.

„Síðustu 12 mánuði hefur þróun fasteignaverðs á landsbyggðinni verið til hækkunar vísitölu neysluverðs í 10 skipti af 12. Það þarf ekki að koma á óvart miðað við þróun á fasteignamarkaði síðustu ár.

Nú í mars var hækkun fasteignaverðs á landsbyggðinni á 12 mánaða grundvelli 22,2% samkvæmt tölum Hagstofunnar og hækkun frá 1. ársfjórðungi 2017 til sama tíma 2018 17,9%. Sú tala stemmir ágætlega við þær tölur um hækkun í stærri bæjum sem kom fram hér að ofan.

Frá því í nóvember hefur þróun fasteignaverðs í stærri bæjum verið mjög óregluleg. Það kemur alls ekki á óvart í ljósi þess hve litlir þessir markaðir eru. Sveiflurnar eru sérstaklega miklar á Akranesi, enda er hann minnsti bærinn af þessum fjórum.

 

Sé litið á vegnar meðalbreytingar á verði miðað við stærð þessara bæja má sjá að verðbreytingar milli mánaða fylgja ekki sama mynstri og tölur Hagstofunnar úr vísitölu neysluverðs. Samkvæmt tölum Þjóðskrár hefur vegið meðaltal verðhækkana í þessum fjórum bæjum verið tæp 8% frá því í nóvember en tölur Hagstofunnar segja hækkunina um 7%. Heildarhækkunin er svipuð en breytingin milli einstakra mánaða er mjög mismunandi,“ segir í Hagsjánni.

Sömu upplýsingar koma fram í mánaðarskýrslu Íbúðalánasjóðs þar sem segir að undanfarna mánuði hafi íbúðaverð á landsbyggðinni hækkað töluvert hraðar en íbúðaverð á höfuðborgarsvæðinu.

Hagsjá Landsbankans má sjá hér og mánaðarskýrslu Íbúðalánasjóðs hér.