Skemmdir í Perlunni minni en menn óttuðust

Skemmdir vegna brunans í Perlunni í gær eru minni en eigendur sýnigar í húsinu óttuðust en hreinsun og tiltekt hófst í húsinu í morgun. Slökkvilið var að störfum vegna brunans í um tólf klukkustundir. Perlan verður lokuð í einhverja daga vegna brunans.

Slökkvilið höfuðborgarsvæðins var með hámarks viðbúnað þegar eldur kom upp í klæðningu í einum tankanna við Perluna um klukkan hálf þrjú í gær.

Allur tiltækur mannafli og tæki voru send á staðinn en erfitt var að komast að rótum eldsins sem leyndist á bakvið klæðningar í tanknum. Slökkvistarfi lauk um klukkan ellefu í gærkvöldi en slökkviliðsmenn voru með vakt við húsið til klukkan tvö í nótt.

Gunnar Gunnarsson, forstjóri Perlu norðursins, sem leigir jarðhæð Perlunnar segir að skemmdir hafi sem betur fer reynst minni en hann óttaðist í gær en skemmdir séu vegna vatns og reyks.

„Það er lykt í húsinu. Við höfum það markmið að opna hér sýningu á heimsmælikvarða og munum ekki opna húsið ef það er lykt í því. Þannig að við viljum tryggja að upplifun gesta sé 100 prósent,“ segir Gunnar.

Þetta muni tefja opnun sýningarinnar Undur íslenskrar náttúru lítillega en vonandi takist samt að opna hana næstkomandi föstudag.

„Ef lyktin er farin opnum við húsið um leið. Perlan er lykil mannvirki í Reykjavík. Þetta er hús sem getur ekki verið lokað.“

 

Það var verið að vinna inni í tanknum að stjörnumiðstöðinni ykkar. Mun þetta tefja það verk mikið?

„Nei, ekkert. Við stefnum að því að opna stjörnuver Perlunnar á haustmánuðum. Við stefndum að 1. október og ætlum að halda okkur við þá dagsetningu,“ segir Gunnar.

Þegar eldurinn kom upp í gær hafði Gunnar miklar áhyggjur af dýrum búnaði sem tengist sýningum í Perlunni og metinn er á um tvo milljarða króna. En unnið er að uppsetningu mikillar sýningar í húsinu, meðal annars stjörnumiðstöðvar í tanknum þar sem eldurinn kom upp.

Slapp hann eða urðu skemmdir á hluta hans?

„Það lítur út fyrir að mestur hluti búnaðarins sé í lagi. Hins vegar er það þannig að þegar reykur fer inn í skjávarpa og skjávarpar eru ekki vinur vatns, vitum við aldrei hvernig fer. Við erum að fara að kveikja á græjunum okkar á eftir. Ég get ekki sagt nákvæmlega um stöðuna á skjávörpunum en allur okkar aðaltölvubúnaður virðist vera í lagi og lang stærsti hluti sýningarinnar er í lagi.“

Er búið að dæla öllu vatni út? Þetta var auðvitað mikið magn af vatni sem fór þarna inn?

„Já. Öllu vatni var dælt út í nótt,“ segir Gunnar Gunnarsson.