Murty rekinn frá Rangers │ Gerrard kynntur á næstu dögum?

Graeme Murty hefur verið vikið úr starfi sem bráðabirgðastjóri skosta liðsins Glasgow Rangers eftir stórtap gegn erkifjendunum í Celtic um helgina.

Rangers tapaði leiknum 5-0 og fögnuðu nágranarnir skoska meistaratitlinum með sigrinum.

„Hann mun taka sér tíma í að skoða þær stöður sem í boði eru, meðal annars að snúa aftur í starf sitt hjá akademíu Rangers,“ sagði í tilkynningu frá félaginu. Murty hefur verið við stjórnina síðan Pedro Caixinha var rekinn í desember.

Aðstoðarþjálfararnir Jimmy Nicholl og Jonatan Johansson munu stýra liðinu í þeim þremur leikjum sem eftir eru á tímabilinu.

Samkvæmt fréttum síðustu daga hafa forráðamenn Rangers boðið Steven Gerrard, fyrrum fyrirliða Liverpool og stjóra unglingaliðs Liverpool, stjórastarfið hjá Rangers og eiga viðræður á milli Gerrard og Rangers að vera komnar vel á veg.

„Félagið vonast eftir því að geta tilkynnt frekar um stjóramál fljótlega,“ sagði í tilkynningu félagsins.