Yfirsást að telja rafrænu nöfnin

Við talningu á undirskriftum vegna íbúakosningar um nýtt skipulag í miðbæ Selfoss gleymdist að telja rafrænar undirskriftir. Hlutfall kjósenda sem ritaði undir hækkar úr 29,4 prósentum í 32,4 prósent.

Í yfirlýsingu aðstandenda undirskriftasöfnunarinnar segir að endurmat Þjóðskrár hafi leitt þetta í ljós.

Sjá einnig: Deila um undirskriftir vegna íbúakosningar

„Það gleymdist einfaldlega að gera ráð fyrir rafrænu undirskriftunum í fyrri talningunni,“ segir Aldís Sigfúsdóttir, einn ábyrgðarmanna söfnunarinnar.

Deilt er um það hvort gera skuli undirskriftalistana opinbera en ábyrgðarmenn telja það stríða gegn persónuverndarlögum. Sveitarfélagið vill að slíkt verði gert svo fólk geti staðfest að það hafi skrifað undir listann í raun.