Umfjöllun og viðtöl: Stjarnan - Fylkir 3-0 │Stjarnan skellti Fylki

Stjarnan vann sinn fyrsta sigur sinn í Pepsi-deildinni í sumar þegar liðið sigraði Fylki, 3-0, á Samsung-vellinum í Garðarbæ.

Bæði lið byrjuðu leikinn af krafti en það voru gestirnir í Fylki sem fengu fyrsta færi leiksins. Jon­ath­an Glenn fór þá illa að ráði sínu og skaut yfir eftir mistök Haraldar Björnssonar í marki Stjörnunnar.



Í kjölfarið fóru Stjörnumenn að sækja stíft á Fylki og strax eftir 13. mínútna leiksins náði Guðjón Baldvinsson forystunni fyrir Stjörnuna. Þorsteinn Már Ragnarsson kom boltanum fyrir markið og skoraði Guðjón með hnitmiðuðu skoti í hornið.



Hilmar Árni Halldórsson bætti síðan við öðru marki fyrir Stjörnuna átta mínútum síðar. Ari Leifsson gerðist þá sekur um slæm mistök í vörn Fylkis þegar hann missti boltann frá sér á hættulegum stað. Þorsteinn Már kom boltanum á Hilmar Árna sem var kláraði færið af miklu öryggi, hans áttunda marki í síðustu sex leikjum.



Stjörnumenn héldu áfram að sækja en gátu þakkað Aroni Snæ Friðrikssyni í markinu fyrir að hafa ekki verið meira en tveimur mörkum undir í hálfleik.



Síðari hálfleikur var heldur tíðindalítill. Stjörnumenn voru þéttir fyrir og náðu Fylkismenn aldrei að komast almennilega inn í leikinn. Á 81. mínútu komst Stjarnan í 3-0. Aron Snær varði þá boltann beint fyrir fætur Baldurs Sigurðssonar sem gulltryggði verðskuldaðan sigur Stjörnunnar.

Af hverju vann Stjarnan leikinn?

Stjarnan var betri á öllum vígstöðum í dag. Mörkin hefðu getað vel getað verið fleiri hjá þeim bálklæddu á meðan Fylkismenn voru í miklum vandræðum með að skapa sér færi.


Hverjir stóðu upp úr?

Baldur Sigurðsson var besti maður vallarins og kórónaði hann frábæran leik með þriðja marki Stjörnunnar. Guðjón Baldvinsson og Hilmar Árni áttu einnig mjög góðan dag, sem og nær allt Stjörnuliðið.


Hvað gekk illa?

Það var fátt sem gekk upp hjá Fylki í þetta í skiptið. Fljótlega fór að fjara undan baráttuandanum sem hefur einkennt liðið í sumar og virtist sem menn hafi ekki haft mikla trú á verkefninu.


Hvað gerist næst?

Stjarnan á heimaleik gegn Grindavík næsta sunnudag. Fylkir á síðan erfiðan leik fyrir höndum næsta mánudag þar sem FH-ingar taka á móti þeim á Kaplakrika.

Baldur: Jafnvel að maður hefði tekið 0-0 fyrirfram

„Þrjú mörk á heimavelli, að halda hreinu og skora þrjú, það er virkilega kærkomið,“ sagði Baldur Sigurðsson, fyrirliðið Stjörnunnar, í leikslok.

Það var þungu fargi létt af Stjörnunni eftir að fyrsti sigur liðsins kom í kvöld.

„Fyrsti sigurinn, það þýðir mikill léttir. Ekki bara sigurinn, það var frábært að halda hreinu líka. Það er jafnvel að maður hefði tekið 0-0 fyrirfram, út af því að við vorum búnir að fá allt of mikið af mörkum á okkur.“

„Mér fannst þessi leikur vera framhald af síðasta leik á móti Val. Þar fannst okkur pínu á okkur brotið varðandi vítaspyrnur og aðra hluti. Þetta var góð þróun. Vissulega vorum við heppnir, þeir komust í góða stöðu í fyrri hálfleik þar sem við sluppum með skrekkinn. En eftir það fannst mér við í rauninni getað verið búnir að loka þessum leik í fyrri hálfleik.

Markaskorun hefur ekki verið vandamál hjá Stjörnunni það sem af er tímabili en þetta var í fyrsta sinn sem liðið hélt hreinu í sumar.

„Varnarleikurinn er bara eitthvað sem við erum búnir að vera að skoða síðan í fyrsta leik, þegar við misstum niður leikinn á móti Keflavík. Mér finnst þetta vera að detta með okkur núna. Það er virkilega góð tilfinning að vera ekki að fá á okkur mark úr föstu leikatriði, að vera ekki að fá á okkur dæmt á okkur víti. Þetta er bara Stjörnuvörnin sem við þekkjum.

Þá hrósar Guðjón sóknarleik sinna manna, en Stjarnan hefði vel getað skorað fleiri mörk í dag.

„Ég var virkilega ánægður með sóknarleikinn, alveg frá aftasta til fremsta manns. Gott að hafa Alex og Eyjó, þeir voru frábærir á miðjunni og bakverðirnir okkar eru ódrepandi í að koma upp kantinn. Það er erfitt að verjast þessu þegar við sækjum á svona mörgum.

„Menn voru ferskir og það skilaði sér í mörgum færum. Það hefði verið gott að vinna þetta stærra, markatalan var ekki okkur í hag, en við erum held ég komnir aðeins í plús núna, það er jákvætt,“ sagði Guðjón að lokum.

Jón Þór: Löngu tímabær sigur„Þetta var frábær leikur hjá okkur og löngu tímabær sigur,“ sagði Jón Þór Hauksson í leikslok. Hann stýrði liðinu ásamt Veigari Páli Gunnarssyni í fjarveru Rúnars Páls Sigmundssonar, en hann var staddur í Svíþjóð að taka UEFA Pro þjálf­ara­gráðu.



„Mér fannst við gjörsamlega frábærir í fyrri hálfleik. Strákarnir komu gríðarlega öflugir til leiks. Þeir pressuðu Fylkismennina hátt uppi og héldu Fylkismönnunum inni á sínum vallarhelmingi nánast allan fyrri hálfleikinn.“

„Við sköpuðum okkur fullt af færum. Sóknarleikurinn var frábær, varnarleikurinn var frábær. Ég hefði viljað sjá okkur koma jafn kröftuga út í seinni hálfleikinn en sem betur fer náðum við þessu þriðja marki.“



Þá hrósaði Jón Þór hugarfari sinna manna sérstaklega eftir sigurinn.



„Hvernig við komum til leiks, þeir voru virkilega öflugir og kröftugir. Menn voru að vinna fyrir hvorn annan. Þetta var virkilega öflug liðsframmistaða hér í dag.“



Þetta var fyrsti sigur Stjörnunnar í sumar og fullyrti Jón Þór að nú væri liðið mætt til leiks.



„Algjörlega, það var virkilega gott að ná svona heilsteyptri frammistöðu eins og í dag, á báðum endum vallarins. Sóknarleikurinn var frábær og varnarleikurinn. Þetta var frábært að sjá,“ sagði sáttur Jón Þór að lokum.