Franski leikstjórinn Luc Besson hefur verið sakaður um nauðgun. Lögregluyfirvöld í París hafa málið til rannsóknar.
Samkvæmt frétt BBC komu ásakanirnar inn á borð lögreglu á föstudag en um er að ræða leikkonu sem Besson þekkir til. Leikstjórinn þvertekur fyrir ásakanirnar sem sagðar eru „fáránlegar“ í yfirlýsingu frá lögfræðingi hans.
„Hann þekkir til stefnanda og hann hefur aldrei hagað sér á óviðeigandi hátt í hennar garð,“ segir enn fremur í yfirlýsingu.
Besson er 59 ára og er einn þekktasti leikstjóri Frakka. Hann hefur leikstýrt kvikmyndum á borð við Le Grand Bleu, Leon, Subway, The Fifth Element.
