Alisson vill fara til Real Madrid

Liverpool er á höttunum eftir markverði eftir hræðileg mistök Loris Karius í úrslitaleik Meistaradeildar Evrópu þar sem hann gaf Real Madrid tvö mörk. Efsti maður á óskalista Liverpool vill þó fara til þreföldu Evrópumeistaranna í Madrid.

Brasilíski markvörðurinn Alisson er sagður vera á leið frá ítalska félaginu Roma í sumar. Hann er samkvæmt fjölmiðlum á Englandi efstur á óskalista Liverpool í leit þeirra að nýjum markverði.

Alisson vill þó frekar fara í sólina á Spáni heldur en til Liverpool borgar samkvæmt spænska miðlinum Marca, þrátt fyrir að þurfa að keppa um byrjunarliðssæti við Keylor Navas.

Alisson er aðalmarkvörður brasilíska landsliðsins og er einn þriggja markvarða í 23 manna lokahópi Brasilíu sem er á leiðinni á HM í Rússlandi.