Rooney nefbrotnaði en er kominn á blað fyrir DC United

Wayne Rooney bar fyrirliðabandið í leik DC United gegn Colorado Rapids. Hann skoraði sitt fyrsta mark fyrir félagið í leiknum og nefbrotnaði.

Rooney skoraði fyrsta mark leiksins framhjá fyrrum liðsfélaga sínum hjá Manchester United, Tim Howard, sem stóð í marki Colorado. Það var jafnframt hans fyrsta fyrir nýja félagið.

Í uppbótartíma fékk Colorado horn. Í klafsinu inni á teignum nefbrotnaði Rooney og fékk skurð á andlitið sem þurfti fimm spor til þess að loka samkvæmt frétt Washington Post.

Þetta var fyrsti byrjunarliðsleikur Rooney fyrir DC United. Leiknum lauk með 2-1 sigri heimamanna í DC.