Hörður og félagar héldu hreinu en náðu ekki að skora

Hörður Björgvin Magnússon spilaði sinn fyrsta leik í rússnesku úrvalsdeildinni er CSKA Moskva gerði markalaust jafntefli við Krylya Sovetov Samara í kvöld.

Hörður Björgvin spilaði allan leikinn fyrir CSKA en hann gekk í raðir liðsins frá Bristol í sumar. Hann vann á dögunum Ofurbikarinn með liðinu en leikurinn í kvöld var fyrsti í deildinni.

Þrátt fyrir mikla yfirburði CSKA gegn nýliðunum í Krylya Sovetov Samara náðu gestirnir frá Moskvu ekki að troða inn sigurmarkinu og því leik lauknum með markalausu jafntefl.

Hörður Björgvin spilaði allan leikinn í hjarta varnarinnar en eins og áður segir var þetta fyrsti leikur liðsins í deildinni. Liðið lenti í öðru sæti á síðustu leiktíð, tveimur stigum frá grönnunum í Lokomotiv.