Segir Líf einnig hafa ullað á Eyþór

Svo virðist sem mikill samskiptavandi sé milli kjörinna fulltrúa í borgarstjórn Reykjavíkur og undrast fyrrverandi borgarfulltrúar framkoma núverandi borgarfulltrúa. Sálfræðingur segir skort á gagnkvæmri virðingu.

Samskipti borgarfulltrúa Reykjavíkurborgar hafa verið hávær umræðunni frá því í gær eftir að fulltrúar í minnihluta borgarstjórnar létu bóka að Líf Magneudóttir, fulltrúi Vinstri grænna hafi ullað á Mörtu Guðjónsdóttur fulltrúa Sjálfstæðisflokksins.

Þá vakti það einnig athygli í vikunni þegar borgarfulltrúar Sjálfstæðisflokksins gengu út af fundi skipulagsráðs Reykjavíkurborgar en í kjölfarið lét borgarfulltrúi Samfylkingarinnar, hafa það eftir sér að um væri að ræða „hugsanlega vanhugsaðasta og vandræðalegasta upphlaup sem hún hefði orðið vitni að á 8 ára ferli í pólitík“.

Svo virðist svo grunnt sé á því góða hjá borgarfulltrúum hjá Reykjavíkurborg og hefur málið komið til tals hjá fyrrverandi borgarfulltrúum sem allir eru sammála um að vera fegnir að vera lausir.

Beinar útsendingar?

„Maður veltir því fyrir sér hvort það eigi ekki bara að vera beinar útsendingar frá þessum lokuðu fundum fyrst að Spaugstofan er hætt,“ sagði Guðfinna Jóhanna Guðmundsdóttir, fyrrverandi borgarfulltrúi Framsóknar og flugvallarvina.

Bara rugl

„Ég skil ekki hvað er í gangi þarna. Að vera eltast við einhver smá mál og ullandi og starandi á hvort annað og bókandi um það. Bíddu hvað gerir það fyrir borgarbúa. Hvað gerir það fyrir fólkið sem er að bíða eftir þjónustu, húsnæði, betri götum. Hvað gerir það fyrir heimilislausa? Þetta er bara rugl,“ sagði Halldór Halldórsson, fyrrverandi borgarfulltrúi Sjálfstæðisflokksins.

Málefnin týnast

„Eins og þetta birtist í fjölmiðlum finnst mér þetta svolítið verið að reyna gera allskonar mál úr öllu og fólk er að reyna fóta sig svolítið. Mér finnst málefnin týnast í svona orðaskaki,“ sagði Halldór Auðar Svansson, fyrrverandi borgarfulltrúi Pírata.

Eigi að sýna gott fordæmi

Sálfræðingur sem fréttastofa ræddi við í dag segir það sérstakt að fylgjast með samskiptum borgarfulltrúanna eins og þau birtast almenningi í fjölmiðlum, samfélagsmiðlum og opinberum gögnum. Almennt eigi fólk í þessari stöðu að sýna gott fordæmi í hegðun sinni.

„Þetta þekkist bara vel í þegar hópur fólks kemur saman að við getum dottið í þessar gryfjur. Númer eitt, tvö og þrjú í árangursríkum samskiptum þarf fólk að sýna gagnkvæma virðingu,“ sagði Helgi Héðinsson, sálfræðingur hjá Líf og sál.

Yfirlýsing Lífar

Líf Magneudóttur, borgarfulltrúa Vinstri Grænna var boðið að mæta Mörtu Guðjónsdóttur, borgarfulltrúa Sjálfstæðisflokksins í beinni útsendingu í kvöldfréttum Stöðvar 2 í kvöld til þess að ræða samskipti borgarfulltrúanna en hún komst ekki og sendi þess í tilkynningu sem er birt hér í heild sinni;

„Á fundinum sá ég að Marta Guðjónsdóttir misskildi mig og tók uppátæki mínu illa. Ég ræddi því málið við hana í mesta bróðerni og hélt að þar með væri því lokið. Marta vildi hins vegar frekar slá pólitískar keilur með því að gera þetta að fréttamáli. Það er hennar val," segir Líf.

„Í mínum huga er þetta lítilvægt mál og því lauk af minni hálfu með einlægri afsökunarbeiðni sem Marta kaus að taka ekki. Mér finnst dapurlegt að það sé látið skyggja á stærri og veigameiri verkefni sem borgarstjórn vinnur að og er hugsi yfir því hve málefnafátæktin virðist mikil í röðum minnihlutans að hafa ekki um annað að fjalla. Oft er ráðist að persónu fólks, niðrandi orðfæri notað um samstarfsfólk og ógnandi og kúgandi hegðun viðhöfð á lokuðum fundum til að halda öllu í heljargreipum. Ég tel að það sé í höndum minnihlutans að svara af hverju hann velur að hegða sér með jafn ómálefnalegum hætti og við höfum orðið vitni að m.a. í fjölmiðlum. Margir í minnihlutanum ættu að líta sér nær ef þeir vilja bæta samskiptin og vinnuandann í ráðhúsinu og af viðbrögðum Mörtu Guðjónsdóttur í þessu máli er ekki að sjá að mikill vilji sé til þess að vinna málefnalega í þágu borgarbúa í sátt og sanngirni. Ég sjálf hef ekki annað í hyggju en að sinna störfum mínum af sömu alúð og vandvirkni og hingað til,“ segir Líf í tilkynningu sinni. 

Samskiptin hafi áhrif á úrlausn mála

Marta Guðjónsdóttir, borgarfulltrúi Sjálfstæðisflokksins, segir samskipti borgarfulltrúa farin að hafa áhrif á úrlausn mikilvægra mála borginni.

„Það hefur viðgengist allt of lengi að það sé sýndur dónaskapur og óháttvísi. Andrúmsloftið er orðið ansi eitrað og í stað þess að við séum að einbeita okkur að þeim málum sem við höfum verið kjörin til að þá fer tíminn í svona óþarfa mál og því verður að linna. Þess vegna lagði ég fram þessa bókun til þess að varpa ljósi á þessi mál svo fólk fari aðeins að velta fyrir sér til hvers þau voru kjörin og fari að vinna að þeim verkefnum sem við eigum að vera vinna að.“

Marta segir bókunina í gær ekki tilkomna vegna málefnaþurrðar hjá minnihluta borgarstjórnar. „Við hlökkuðum til þess að hefja nýtt kjörtímabil. Það eru þau sem halda þessum slæmu vinnubrögðum áfram, það eru ekki við. Við viljum vinna að þeim brýnu vandamálum sem að steðja að borgarbúum, eins og húsnæðisvandinn, leikskólavandinn og samgönguvandinn svo fátt eitt sé nefnt,“ segir Marta.

Ekki beðist formlega afsökunar

Marta segir Líf ekki hafa beðist formlega afsökunar. „Hún hafði tækifæri til þess í gær til þess að bóka afsökunarbeiðni, hún gerði það ekki, hún nýtti það ekki. Hins vegar ræddi hún við mig í bakherbergi. En það var tilraun til þess að þagga niður í málinu. Það var tilraun til þess að ég legði ekki fram þessa bókun.“

Ullaði líka á Eyþór

„Hafi hún meint það að hún vildi biðjast afsökunar á þessu máli þá hefði hún ekki rekið út úr sér tunguna við oddvita okkar, Eyþór Arnalds, þegar hún gekk út úr borgarráðsherberginu,“ segir Marta.

Marta segist ætla beita sér í að laga þau samskiptavandamál sem eru á milli borgarfulltrúa í borgarstjórn. „Það var tilraun mín til þess að gera það í gær þegar ég lagði fram þessa bókun. Til þess að varpa ljósi á það að við erum að eyða allt of miklum tíma í óþarfa mál og í neikvætt andrúmsloft í stað þess að vera vinna að brýnum hagsmunamálum fyrir borgarbúa,“ segir Marta.