Djúp lægð með stormi á landi og mikilli rigningu væntanleg

Útlit er fyrir að djúp lægð skelli á Íslandi aðfaranótt laugardags. Henni mun fylgja stormur á landi og mikil rigning. Sunnudagurinn lítur þó betur út.

Þetta er meðal þess sem kemur fram í hugleiðingum veðurfræðings á vef Veðurstofunnar. Þar segir að talverður hitamunur sé sé á skilum hlýja og kalda loftmassans suður af landinu og því sé útlit fyrir að laugardagslægðin verði nokkuð djúp.

Þá er alldjúp lægð nú stödd langtsuðvestur af landinu en skilin frá henni munu ganga yfir í dag.

„Það er því allhvasst af suðaustri og vætusamt víðast hvar á landinu, en þurrt að mestu norðaustantil fram yfir hádegi. Það bætir heldur í úrkomuna sunnan og síðar suðaustantil þegar líður á daginn en þegar skilin ganga yfir undir kvöld snýst vindur í suðvestanátt með að því er virðist nokkuð öflugum skúradembum á vestanverðu landinu en mildu veðri fyrir austan,“ segir í hugleiðingum veðurfræðings.

Þrátt fyrir lægðina á laugardaginn skánar veðrið á sunnudaginn, þó áfram verði nokkuð vætusamt sunnan og vestantil.

Veðurhorfur á landinu

Suðaustan 10-18 m/s og rigning en mun hægari vindur norðaustantil á landinu fram að hádegi og yfirleitt þurrt. Sunnan 8-15 eftir hádegi og talsverð rigning sunnan- og síðar suðaustanlands og dálítil væta norðanlands.

Suðvestan 8-15 m/s og skúrir í kvöld og á morgun en rofar aftur til norðaustan og austanlands. Vaxandi suðaustanátt með rigningu við suðurströndina annað kvöld. Hiti víða 5 til 10 stig yfir daginn.

Veðurhorfur á landinu næstu daga

Á föstudag:

Suðvestan 8-15 m/s og skúrir, en bjartviðri norðaustan- og austanlands. Hiti 3 til 8 stig. Snýst í allhvassa en skammvina suðaustanátt um kvöldið og fer að rigna sunnanlands.

Á laugardag:

Suðvestan hvassviðri eða stormur með rigningu, en þurrt að kalla um landið norðaustanvert. Hiti 3 til 10 stig, hlýjast á Austurlandi.

Á sunnudag:

Vestlæg átt og skúrir eða él, en léttskýjað austantil á landinu. Hiti 1 til 6 stig.

Á mánudag:

Áframhaldandi vestlæg átt. Rignign emð með suðurströndinni, en yfirleitt þurrt annars staðar á landinu og bjart norðaustantil. Kólnar smám saman, einkum norðantil.

Á þriðjudag:

Hæg norðlæg eða breytileg átt og þurrt veður, en stöku él nyrst á landinu. Hiti kringum frostmark, en 3 til 5 stig með ströndinni að deginum.

Á miðvikudag:

Útlit fyrir vaxandi suðaustanátt með rigningu og heldur hlýnandi veðri.